Turkey leh Syria ramten lirnghing na tak an tawrh atanga ni 13 a liam meuh chuan thi zat chu mi 46,000 chuang an ni ta a. In 84,000 vel chhiain thenkhat chu hmanhmawh taka tihchim ngai leh chim mai turte an ni hlawm tih thuneitute an sawi.
Turkey-in tun hnaia khuarel chhiatna a tawrh nat ber laka inhai chhuah leh dan an dap mek laiin an thenawm, Syria chuan an tuar na lehzual a, World Food Programme (WFP) chuan hmarthlang lama thuneitute chu lirnghing tuar mi sang telten rang taka puihna an dawn theih nan kalna tur an dante hawng turin an nawr mek zel.
Turkey-ah hian Inrinni zan thleng khan mi 40,642 thi awm tawh anga chhinchhiah an ni a, Syria-ah mi 5,800 chuang ni bawkin a zat hi ni eng emaw zat chhung a danglam tawh lo va, hei aia tam an nih ngei rin a ni.
Inrinni khan Kyrgyzstan atanga thawktute chuan Turkey chhim lama Antakya khawpuia Syrian chhungkuaa mi pangate chu in chim kar atanga lak chhuah an tum a. Naupang telin pathum chu damin an la chhuak a. Nu leh pa ber an dam a, naute erawh tui a lo tlakchham rei tawh avangin an chhan zui thei ta lo tih rescue team chuan an sawi a. A u-te, hmeichhia leh phir unau pawh an dam lo.
Hetih lai hian lir a nghin laia Syria hmar lama piang naute chu a ni leh a pate te nen an inhmu ta a. A nu leh a unaute chu an thi a ni.
Social media-a thlalak leh video thehdarhah chuan chhanchhuaktuten in chim intiang ur karah vaivutin a bawh khah naute an pawm lai hi a lang nasa hle.
He naute hi a hnuah Abdallah leh Afraa Mleihan te fa a ni tih finfiah niin helho awp lai, Syria-a Aleppo province-a Jandaris khuaa mi a ni tih hriat a ni.
Inrinni khan a ni, Hala leh a pasal, Khalil Al-Sawadi chuan an la a, a hmingah a nu hriatreng nan Afraa tih an sa bawk.
World Food Programme (WFP) chuan Syria hmarthlang lama thuneitute chu lirnghing tuarten puihna an dawn thuai theih nan kawng dan titawp thuai turin an nawr.
WFP Director David Beasley chuan agency chuan tlakchham an neih tan thu leh Turkey atanga luhna hawna mamawh lak luh thuai an ngai tih a sawi.
“Kan buaina ber chu Syria hmarthlang lama luh theih a ni a, Syrian thuneituten min pe thei si lo,” tiin Beasley hian Munich Security Conference-ah a sawi.
Syria-ah hian kum 10 chuang tualchhung indona awm tawhin an rethei hle a, hmarthlang chu a tuar na ber ber an sa.
Heng lai hmun hi President Bashar al-Assad-a duh lotu helhovin an thunun a ni a, tuartute pui turin chet vel a khirh hle.