Aizawl: Mizoram tlawha zin, Union Communication State Minister Devusinh Chauhan hoin Inrinni khan sorkar hotuten Mizoram dinhmun leh mamawh hrang hrang sawiin an thukhawm.
MINECO-a Chief Secretary Conference Hall-a thutkhawmah hian Chauhan chuan Mizoramin kawng hrang hrangah chak zawka hma a sawn theih nan e-connectivity tihchangtlun a pawimawh hle dawn tih a sawi a. “Inkalpawhna leh inbiakpawhna (communication & e-connectivity) a thatna apiangah hmasawnna hna chak zawkin a kal thei a, Mizoram anga tlangram leh kawngpui tha siam awlsam lohna hmun angah te hlei hlei e-connectivity a tangkai zual thei,” a ti.
Union minister hian Mizoramah pawh sorkar laipui scheme tam tak kalpui mekah e-connectivity tha neih hmasak loh chuan hnathawh that a har dawn a, thingtlang khaw eng emaw zat chu e-connectivity-in a la thlen phak loh avangin eng emaw chen chu scheme kalpui tum mah se, a thlenna tur dik tak, a tangkaipui tur dik tak mipuiten an chhawr theih loh thin thu a sawi.
ICT Minister Robert Romawia Royte pawhin Mizoram chu tlangram a nih vanga harsatna hrang hrang awm theite sawiin, heng harsatna karah pawh central scheme-te chu Mizoram sorkarin theihtawp chhuahin mipuiten an chhawr phak turin a kalpui mek zel thu a sawi.
Robert Romawia chuan e-connectivity tihmasawn tur chuan service provider hrang hrang, heng BSNL, Airtel, Jio leh a dangte inkarah thawhhona tha zawk neih a tul thu leh hemi kawngah pawh theihtawp chhuah a ngaih thu a sawi bawk.
He hunah hian Mizoram Special Secretary ICT S. M. Ali leh Dr. Lalthlamuana, CIO, ICT Department ten thu an sawi bawk.