Kartawpa ni thum chhung plenery session an neih turah Congress chuan an party hotu lawkten eptu party hrang hrangte tanho dan tur leh an inhlawmkhawm dan tur an duang dawn tih an sawi.
Chhattisgarh-a Nava Raipur-a plenary session an neih tur hi Zirtawpnia tan tur niin palai 15,000 vel tel tura ngaih a ni.
Congress General Secretary Organisation KC Venugopal chuan an party steering committee chu a ni khatnaah thukhawmin party chhunga nawrna a awm mek avangin party thutlukna siamtu sang ber, Congress Working Committee (CWC) inthlan tur leh tur loh an tichiang dawn tih a sawi.
Congress hian 2024 Lok Sabha inthlanpui lo awm turin eptu party hrang hrangte pawt khawma tanhova BJP leh an thuneihna paih thlak dan turah a pawimawh ber pakhat an ni tih an inhria tih Venugopal chuan a sawi.
“Congress hian hemi atan hian hma la mekin political party hrang hrangte pawh a dawr tawh a. Congress-in a tum langsar ber chu eptute thuikhawma 2024 inthlana BJP hneh a ni,” tiin Pathiannia thuthar lakhawmtute a kawmnaah Venugopal chuan a sawi.
“Eptute tanhona hi plenary session-ah tihchian a ni dawn a, hetah hian he thil hi sawi a ni ang,” a ti a, an hnapui ber chu kum 2024-a BJP hneh a ni tih a sawi.
Venugopal chuan tun tuma plenary session an neih tur chu Bharat Jodo Yatra kalpui zelna leh Udaipur Chintan Shivir bawhzuina a ni tih a sawi a. Plenary-ah hian tagline pakhat, ‘Haath se Haath Jodo’ tih an hmang dawn tih a sawi.
Congress General Secretary Communications Jairam Ramesh pawhin an party chuan eptute inpumkhatna chu a pawimawh tih sawiin zau takin plenary session-ah hian an sawi dawn tih a sawi.
“Tute mahin eptu tangrualte hi hruaitu ni turin min ti lo va; mahse, Congress tel lo chuan a hlawhtling thei dawn lo. Nitish Kumar-a thu sawi pawh kha kan pawm em em a, Pu Venugopal-a’n a sawi ang khan plenary-ah kan sawiho ang a, kum 2024 inthlana kan tih dan tur chu a chiang ang,” tiin Bihar Chief Minister Kumar-a’n Congress-in eptute tanrual dan turah hma la se tia a sawi chu a chhang a ni.
“Kan hmaah assembly inthlan tam tak a la awm a; mahse, Congress a chak loh chuan eptu tangrual chang tak a awm thei dawn lo,” tiin Ramesh chuan a sawi bawk.
Congress chuan Kumar-a thil sawite chu an lawm em em tih a sawi a, “Bharat Jodo Yatra khan Congress-ah chauh ni lovin Indian politics-ah nghawng a nei a ni,” a ti.
“Indian politics insiam remna hun a ni a, chu chu a hria a ni,” tiin Ramesh hian Kanyakumari-Kashmir yatra, thla hmasaa Srinagar-a zawh tak chungchang nen a sawi bawk.
“Kan lawm a, inpumkhatna atana kan tih tur pawh kan hria a. Congress chauh hi BJP nena inhnimhnai ve ngai lo political party a ni a. Eptu zingah Rajya Sabha-a Opposition Leader Mallikarjun Kharge-a kawm duh an awm a; mahse, an chet danah erawh rorel lai party lam awn an awm si,” a ti.
Venugopal chuan February 24-26 chhunga 85th plenary session neih tura sawiho turte chu a ni khatnaa steering committee thutkhawmah tihfel a ni dawn tih a sawi a, subjects committee-in thutlukna an siam turte chu an ruahman dawn tih a sawi bawk.