Mizoram Kohhran Hruaitute Committee (MKHC)-in Mizoramin MLA inthlanpui a hmachhawn turah political party-te chu a taka tih theih loh tur zuara mipui bumna ang thil intiam lo turin a ngen.
MKHC chuan MLA inthlanpui lo awm tur atan Mizoram mipui, kohhran leh political party-te tan thuchah siamin inthlanna thianghlim leh zalen taka mi tinin vote an thlak theih nan hel pawl leh ralthuam lam chi hman te, invau te, inbum te, hnam bil zawng te, kohhran leh khawtlang inpumkhatna leh inunauna tichhe zawng tein eng pawl mahin hma la lo se an duh thu an sawi a. Party-te chu a taka tih theih loh tur zuara mipui bumna ang thil intiam lo turin an ngen a ni.
Party-te chu candidate atan mi hmingtha, rinawm leh Pathian tih mi, ruihtheihthila fihlim, hlepna bawlhlawh leh thamna duh lo mi, mipat/hmeichhiat kawnga hminghliau lo, mahni awmna sakhua, pawl leh kohhrana mi rinawmte thlang turin an ngen.
MKHC chuan mipuite chu therhlo leh sum uma vote hralh lo tur leh hetianga tih tumtute hnawl ngam tura tan la turte, zawlnei der leh zawlthupuan hnawl nachang hre tur te-in an ngen.
Ram hruaitu tur mi tha thlan chhuah an nih theih nan leh muanawm taka inthlan a nih theih nan Pathian hnena tawngtai turin mipui an ngen a, sorkarna siamtu apiang chu Mizoram tana Pathianin a pekah pawma sawisel ringawt lova tawiawm tlat turin mipui an sawm thu an thuchhuah ah chuan an tar lang bawk a ni.