Transport deptt. changtu Minister of State TJ Lalnuntluanga’n Aizawl leh Lamka (Manipur) Bus service tur hun reilotea tihfel beisei a nih thu a sawi a. Aizawl – Tahan Bus service tura hmalakna erawh Myanmar ram a buai tak avangin hmalakna a thuanawp ta rih niin a sawi.
Zomi Cultural Society, Aizawl joint committee huaihawt, ‘Zomi Namni’ Bawngkawn Chhimveng cultural hall-a nimina a hmanpuinaah he thu hi Transport Minister chuan a sawi a. Mizoram sorkarin hnam inpumkhatna a ngaihpawimawh thu sawiin, an sorkar tirth atangin Mizoram leh a chhehvela Zofate inpawhna tha zawk a awm theihna turin hma an lak thu leh Aizawl leh Jampui (Tripura) Bus service (Hnam inpumkhatna Bus) pawh tlantir a nih tawh thu a sawi.
TJ Lalnuntluanga chuan Champhaiah Zomi Cultural Centre sa tura hmalak a nih thu leh NEC kaltlanga project siam a nih thu a sawi a. Zomi Cultural Centre Champhaia sakna tur chu Chief Minister Zoramthanga’n priority list-ah a dahsak nia sawiin, lawmawm a tih thu a sawi bawk.
Zomi Namni chhimtu kalkhawmte chu hnam inpawh leh lungrual tak ni zel tura tan la tlang zel turte, hnam inchawikantawn theihna tura mahni zawn theuha theihtawp chhuah zel tur te in TJ Lalnuntluanga chuan chahin, duhsakna a hlan bawk a ni.
Nimina Zomi Namni hi Thang Tuan Pau, M.P (Myanmar) pawhin khualzahawm niin a hmanpui bawk.