Ruah nasa taka sur avangin Brazil chhimchhak lam vaukamah tui lianin lei a min nasa hle bawk a, mi 24 vel thi tawhin mi za telin an awmna an chhuahsan.
Sao Paulo state-a Sao Sebastiao khuaa thil thleng hi television leh social media-a thlalak leh video darhah chuan tuiin a chim vek a, tlang awiha inte chu chirhin a hnawl a, tuiin kawngpui chimin thing tluin car a delh nasa hle bawk tih a lang.
Sao Paulo hmar lam km 200 vela hlaa awm khuaa cheng tam tak hian Kristian kût pakhat, Lent thleng tur avangin kartawp chawlh chu khawpui lamah an awmsan hlawm a. Darkar 24 lek chhungin ruah mm 600 zet a sur hman niin khawpui thuneitute chuan an sawi.
Mayor Felipe Augusto chuan San Sebastiao-ah mi 23 vel an thi tih a sawi a. Ubatuba khuaah hmeichhe naupang a thi bawk tih chanchintharah puan a ni.
Sao Paulo state Governor Tarcisio de Freitas chuan tuipui kam khaw pangaah emergency a puang a. A sorkar chuan mi 566 lai chenna in nei lo an awm tih a chhinchhiah tawh bawk tih a sawi.
Sao Sebastiao leh an thenawm, Bertioga khuaah chuan carnival neih tur pawh an thulh.
“Chhiatna thlen dan kimchang hriat mai theih a la ni lo va, a tuartute chhanchhuah dan tur kan dap mek,” tiin Sao Sebastiao mayor chuan a sawi a, an khuaa thil thleng chu ‘a khirh hle’ tih a sawi.
“In 50 dawn chimah kan buaipui mek a, tui a khauh va, a chhunga tang an la awm a ni,” tiin GloboNews a hrilh.
Kangthelhtu mi 100 chuangin a hmunah hian hna an thawk a, helicopter-ten an pui reng bawk tih tual chhung chanchinbuten an tar lang.
Thil chhia leh chân tam tak karah mipa naupang kum hnih mi chu chirhin a chhilh vek atangin an chhanchhuak tih thuneituten an sawi a, nu nau hring hlim an la chhuak bawk.
Khawcin zirtute chuan Sao Paulo-a tuipui kamah hian ruah a la sur chhunzawm dawn tih an sawi a, chhanchhuah hna thawktute tan a khirh zual dawn a, thi zat pawh an pung thei tih an sawi.
Sorkar laipui pawhin ministry hrang hrangte chu a tuartute pui tur leh thil chhiate pawh siam tha thuai thuaia hna thawk vat turin a ti.
South America-a lawngchawlhna hmun lian ber, Santos-ah pawh thli chak tak, darkar khata km 55 vela chak a tleh reng avang leh tui a fawn nasat avangin lawng a che hleithei rih lo tih tual chhung chanchinbuten an tar lang.
Brazil President Luiz Inacio Lula da Silva chuan chhiatna tawk nasa zual hmunte hi Thawhtanniah a tlawh dawn tih a social media kaltlangin a sawi.
Lula chuan sorkar chuan ‘hliam tuar, chin hriat loh, kawng siam, energy leh inbiakpawhna chhia te siam hna’ thawk thuai thuai turin hma a la bawk tih a sawi.