Aizawl: Mizoram Upa Pawl (MUP) Ramhlun Area-in an buatsaih, Ramhlun Veng hming phuah dan lungphum chu nimin khan Aizawl North II bialtu MLA Dr Vanlalthlana’n a hawng.
Ramhlun Indoor stadium-a hawnna inkhawmah thu sawiin bialtu MLA Dr Vanlalthlana hian tunlai thangthar zawkten Ramhlun veng lo pian dan hria an awm mang tawh loh laia MUP-ten nachang hre tak chung a hriatrengna lungphun an siam chu lawmawm a tih thu sawiin, thangthar lo awm zel turte tan tangkai tak a nih ngei a beisei thu a sawi.
He hun hi C Lalchhandami, Corporator, AMC Ward III pawhin khualzahawm niin a hmanpui bawk.
ZPM thuchhuahin a tar lan danin Ramhlun veng tih hi kum 1959 chawlhni inkhawm banah paho kal khawmin veng hming atan an duhte lakhawmin, Salhnuna, mitdel, paho kalkhawm zinga upa ber pawhtir a ni a, Ramhlun tih a ma phuah ngei chu pawt fuhin chuta tang chuan Ramhlun veng tih hi a lo piang chhuak ta a ni.
Ramhlun Veng hi nasa taka thang chhoin tunah hian local council pawh panga lai a lo piang chhuak ta a, chung te chu – Ramhlun South, Ramhlun Vengthar, Ramhlun North, Ramhlun Venglai leh Ramhlun Sports Complex te an ni.