Japanese motor company lian Honda chuan Formula 1 a kir leh lam an ngaihtuahnaah a tel a, kum 2026 engine regulation thar hman a nih hunah manufacturer anga an tel theihna tur an la tinung.
Honda hian kum 2021 season zawh khan Formula 1 hi an chhuahsan a, nimahsela engine siam lamah Red Bull Racing chu la thawhpui chhunzawm thovin kuminah pawh Red Bull Car te hi Honda hming pu engine la hmang tho tur an ni.
Formula hian kum 2026 atangin engine dan thar an hmang dawn a, he engine regulation thar hnuaiah hian 1600cc turbo hybrid engine an la hmang chhunzawm ang. Nimahsela a khawl lamah erawh a danglam nasa dawn hle a. Boruak chhia pe chhuak lo tur ‘synthetic fuel’ hmang a nih tawh tur bakah kawlphetha hmang tel a ni dawn.
Honda hian F1 an chhuahsan chhan zingah ‘electric vehicle’ lama hmasawnna tura insawrbing an tumna chu lian mahse F1 lama kir lehna kawng hi an khar ngai lo.
Honda president Koji Watanabe chuan, “Tun dinhmunah chuan F1 kaldan hi ngun takin kan ngaihven ve reng a, an kawng zawh hi kan thlir ve reng. Kan kir lehna turah erawh thutlukna mumal tak a la awm lo.” tiin a sawi.
“F1 hian electrification lam a pan nasa hle a, kan company hian carbon neutrality kan ngaih pawimawh avangin F1 kal zel tumdan nen pawh hian kan kal duhdan a inhnaih hle.” a ti bawk.