Aizawl: Zawlpui Branch YMA-in Lunglei Police-ten February 19-a heroin hawng 300 an mansak mi palite chu an khua leh tui dik tak ni mah se, rei tak an khuaa awm tawh lo niin an sawi a. An khua tihmingchhetute chu an dem thu an sawi.
Nimin khan thuchhuah siamin Zawlpui Branch YMA chuan Lunglei Police-ten heroin an man neitua puh, Lalhruaitluanga (26), Lalnunmawia (22) leh kumtlinglo pakhat chu Zawlpui khua leh tui dik tak an nih thu an tar lang a. An ruala man, Thenhlum khua nia insawi, Lalnunmawia pawh Zawlpui khua leh tui tho niin an sawi.
Zawlpui YMA chuan an khawtlang tihmingchhetute chu an dem hle tih sawiin, tun hnuah hetiang thil hi ti tawh lo se an duh thu an sawi a. Police-ten ruihhlo tawlh ching an man chu lawmawm an tih thu leh Zawlpui branch YMA-in theih tawpa an thlawp zel tur thu an sawi bawk.