Manchester United chhuanvawr Marcus Rashford dang thei an la awm lova, goal hnih a khung zarah 3-0 in United in Leicester City an hneh.
Pathianni zana Old Trafford a Premier League inkhelah English forward hian minute 25-na leh 56-naah goal a khung a. Tun season-ah goal 24 a khung tawh.
A goal pahnih hi Bruno Fernandes leh Fred te ball pek atanga a khung a ni a, inrintawkna nena khelin goal hmaah a hriam tih a lantir. England player dang Jadon Sancho chuan an goal thumna a khung a, United goal thumna luhna tura an ball inpe kual hmuh a nuam hle.
A awlsam lo
A tawp result-ah chiang viau mahse inkhelah erawh team pahnihte an inthlau lova. Leicester City in first half-ah chance tha zawk an nei ngun a, United goalkeeper David de Gea chuan tha tak maiin tum hnih a team a chhanhim.
Harvey Barnes leh Kelechi Iheanacho te hun remchang neih atang goal lut se inkhel kal dan a danglam vek ang.
Leicester City an vanduai a, a zawna match thum tlawm lova an kal chu tawpin league-ah 14-na an ni mek.
Hetihlai hian United in second half a an inremdan an thlak danglam hnuah inkhel an thunun thei zawk a, attacking midfield-ah Sancho dah luh a nih hnuah an ball inpe kual a hlauhawm thin.
Manchester United manager Erik ten Hag chuan, “Leicester hi team tha tak an ni a, an kheltha a kan tan chak an ti harsa hle.”
“Kan thiam loh pawh a tel a, kan inkhelh duhdan angin kan khel lova, kan tih tur tih loh kan nei hnem a, kha kha kan tuar a ni.” tiin a sawi bawk.
Pathianni zan inkhel hnuhnung zawkah Tottenham in 2-0 in West Ham United an hneh.
Tottenham Hotspur Stadium-ah Spurs tan Emerson Royal leh starting XI a telh loh substitute Son Heung-min ten goal an khung.