Nagaland assembly inthlan tura campaign boruak sang mek zelah buaina a chhuak zeuh zeuh a. Pathianni khan buaina chhuakah mi panga velin hliam tuarin lithei eng emaw zat tihchhiat a ni bawk tih police-in an sawi.
National People’s Party (NPP) leh Lok Janshakti Party (LJP) thlawptute chu Pathianni chawhnu khan Noklak district-a Thonoknyu bialah an intibuai a ni.
Pawl hnih hi nasa taka lunga intawngin mi pali velin hliam tenau an tuar a. State police, Indian Reserve Battalion leh Border Security Force (BSF) an inrawlh hnuah boruak an khap dai thei chauh niin police officer-in a sawi.
Hmun danga buaina chhuakah mi pakhatin hliam tuarin lirthei panga vel tihchhiat a ni bawk a. He thil hi mi tute nge an nih la hriat chiah lohten NPP state president Andrew Ahoto Sema-a leh a hote lirtheia kal chu lungin an lo vawm a, Sema leh a hote hi Kiphire district-a Thoktsur khuaa campaign-a an kal haw lam niin Pathianni zan khan beih an ni.
Dimapur-ah pawh Inrinni zan khan tute nge an nih hriat lohten Dimapur II biala NDPP candidate chenna in, Indisen khuaah silaimu awm lovin nasa takin silai an hmet puak bawk.
Indisen Youth Organisation-in an sawi dan chuan LJP (Ram Vilas) mi leh sate an ni a, lirthei paruk pasarih vel hmangin an thawk chhuak a, nasa taka au rualin um ruaktein candidate in hi an vawm niin an sawi a. Silaimu awm lo hi vawi ruk vel an hmet puak bawk a, an tlanchhe zui ta niin an sawi.
Police chuan LJP mi leh sa nia hriat ta lirthei pahnih an man tawh.