Turkey-in chawlhkar hnih dawn liam taa lirnghing na tak an tawrh avanga chhanchhuah hna an thawh chu hmun hnihah tih loh chuan an tawpsan ta tih an ram disaster agency chuan a sawi.
Mi zawn hna hi Kahramanmaras leh Hatay-ah chauh an kalpui tawh dawn tih agency hotu chuan a sawi.
Dama lak chhuah tur an awm beiseina chau hle tawh mah se in chim kar atanga nung dama hmuh an la awm zel erawh an la inring.
Hetih lai hian US Secretary of State Antony Blinken chuan Turkey thlengin nunaute puihna tur $ maktaduai 100 an pek tur thu a sawi.
February 6-a magnitude 7.8-a na lirnghing kha Kahramanmaras atanga intan a ni a. Turkey chhimchhak leh Syria hmar lamah mi 44,000 chuangin an thih phah.
Thi zat hi an la pun zel pawh an ring a, Turkey-ah hian appartment 345,000 chuang chhia awmin mi tam tak chin hriat a la ni lo va. Ram pahnihte hian chin hriat lohva awm zat tak hi an la hre thei lo ve ve.
“Kan province tam zawkah chuan mi zawn leh chhanchhuah hna chu a zo tawh,” tiin disaster agency-a an hotupa, Yunus Sezer chuan Ankara-a thuthar lakhawmtute hnenah a sawi.
Mi zawn leh chhanchhuah hna chu province pahniha in 40 velah thawh chhunzawm an la tum tih a sawi a, in zat pawh hi a tlem hret hret erawh rin a ni.
Chhanchhuah hna thawktute chuan lir a nghin atanga ni 11 chuang a liam hnu, Zirtawpni khan mi pathum damin an la la chhuak a, in chim karah an lo tang.
Blinken-a hi lir a nghin hmaa zin tur kha a ni a, tunah hian an tawrhna a tawrhpui tih lantir nan tha tharin a tlawh a. Kum hnih chuang liam taa a pisa a luah hnua Turkey a tlawh hmasak ber a ni.
Puihna an pek tur a puan chu ‘a thleng thuai dawn’ tih a sawi a. “Tuna mi zawn leh chhanchhuah nan a ni tawh meuh lo va, nakin zela indin thar lehna tur a tam zawk a. Hun rei zawk thlir chunga pek tur a ni,” tiin thuthar lakhawmtute hnenah a sawi.
Syria rama puihna pek erawh ‘thil hautak tak’ a nih thu a sawi.
Blinken-a hi Hatay tlawhin lirnghing tuartute dinhmun a en dawn a, President Recep Tayyip Erdogan nen Thawhtanni khan an inkawm zui a. Hetah hian Sweden leh Finland ramten Nato member nih an dilna Turkey-in a pawm loh chungchang an sawi ang.