- Ruata
Kum 2023 FZS, FZ-X, R15 leh MT15 te an tlangzarh hnuah Yamaha chuan an 125cc scooter ho chu kum 2023 model an tichhuak leh ta a, Yamaha lirthei te hi a in update tha hlawm ta viau a, thil thar kan hmu nual dawn bawk a ni.
Yamaha scooter chhuak mek, kum 2023 model tihchhuah thar te hi – Fascino 125 Fi Hybrid, Ray ZR 125 Fi Hybrid leh Ray ZR Street Rally 125 Fi Hybrid te a ni a. Fascino S 125 Fi Hybrid disc hi Rs 91,030 man a ni a, Ray ZR 125 Fi Hybrid disc variant hi Rs 89,530 man a ni thung. Ray ZR Street Rally hi Rs 93,530 (ex-showroom) man a ni bawk a ni. Heng hi tarlan angin ex-showroom man a ni a, hei bakah hian Aizawla an ex-showroom man nen chuan a inang lo hret maithei bawk a. Kawngpuia tlan thei tur chuan chawi belh neuh neuh registration, insurance leh adangte a awm a, heng hi belh a nih chuan a man (on-road price) hi a tam deuh hret dawn a ni.
Kum 2023 Yamaha 125cc hybrid scooter range te hi tunah chuan E20 fuel-compliant engine hmanga thuam a ni tawh a. He engine hian OBD2 emaw real driving emission (RDE) norms thar a zawm bawk a. Hei hian a khawl tha taka enkawl a nih theihna atana ‘data’ pawimawh te, a scooter atanga ‘real time emission’ an tih, a boruak bawlhhlawh pekchhuah tam zawng tha taka vilna turin a pui a ni.
Kum 2023-a Yamaha Fascino & Ray ZR 125cc hybrid scooter te hi Yamaha Bluetooth hmanraw changkang tak, Y-Connect App hmanga thawm a ni a. He App hian a tui heh zawng, maintenance tih hun, a scooter awmna hmun chhui, a lirthei chhe lai hriattir, a khalhtuin khawl a thunun dang chungchang leh thil dang tam tak a tilang thei a ni. Hei vang hian himna kawngah te, a neitute tana awlsamna leh enkawl thuah te he technology changkang tak hian heng scooter leitute hi nasa takin a pui thei dawn a, hei vang hian lei manhla tak a ni dawn a ni.
2023 Fascino leh Ray ZR Fi Hybrid scooter disc variant hi Dark Matt Blue rawng thar hmanga thuam a ni a, Ray ZR Street Rally 125 Fi Hybrid scooter hi rawng thar pahnih – Matte Black leh Light Gray Vermillion te duhthlan tur a awm tawh dawn bawk a ni. Ray ZR-a disc & drum variant hian a rawng awmsa – Matt Red, Metallic Black leh Cyan Blue a awm dawn bakah graphics (a design tial) thar a chei a ni dawn bawk a ni.
A khawl lam
Kum 2023 Yamaha scooter model hrang hrangte hian BS-VI OBD2 & E20 fuel compliant, air-cooled, FI, 125cc blue core khawl a hmang a. He khawl hian 6500rpm ah 8.2 PS leh, 5000rpm-ah peak torque 10.3 Nm a pe chhuak thei a ni. He hybrid engine hian Smart Motor Generator (SMG) System a keng tel bawk a ni.
Intelligent Power Assist feature hian SMG system hmangin hna a thawk a, hei hian a electrical system tichakin hemi hnuaiah hian “Automatic Stop & Start system” a nei a, hei hian engine idling & throttle twist & side stand engine cut-off switch leh thildang hrang hrangin tha taka hna a thawh theih nan a lo pui a, hna tha takin a thawh tir a ni.
Yamaha hian reiloteah an lirthei huang hrang hrangte chu kum 2023 model-ah an thlak dual mai a. Hei hi Yamaha lirthei ngainatute tan chuan thil lawmawm leh hmalakna ropui tak a ni a. Yamaha lirthei lei tum tan pawh kumin model duhthlan tur a tam ta em em mai a. Hei hian ke hnih nei lirthei leitute pawh nasa tak a hip a beiseiawm a ni.