Aizawl: Chhiahtlang Hmar Veng Branch YMA-in an khaw dai, Far Huan Tlanga ‘Zo khua’ an din chu Art & Culture Director Carol VLMS Dawngkimi’n nimin khan a hawng.
Hawnna inkhawmah thu sawiin Carol VLMS Dawngkimi chuan Zo khaw dinna tura khawtlang mipui tanrualna leh thawhona tha tak an nei chu lawmawm a tih thu sawiin, an hnathawh avangin thangtharten a takin pipute khawsak dan an hmu thei tur chu art & culture dept pawh an lawm hle tih a sawi.
Zokhua ngaihhlut nachang hre thar zel tur leh art & culture dept chu chhawr tangkai nachang hre thar zel turin a chah a. Zo Khaw din tanpui nan Rs. 30,000 a hlan bawk.
Zo khua hawnna innkhawmah hian khual zahawm, Serchhip District Agriculture Officer Tlangtimawia leh YMA hruaituten thu an sawi a. Zo khuaah hian zawlbuk, leikapui leh Mizopa in sak niin hnatlang tha 700 chuang sen ral a ni.