Aizawl : Aizawl Bawrhsap Dr Lalriatzuali Ralte kaihhruaina hnuaiah nimin khan Central jail dinhmun an enfiah a. Jail-a thuneitute nen harsatna hrang hrang sutkian dan turte an sawi ho.
Central Jail Special Supt Zosangliana leh Central Jail Medical Officer Dr. CT Lalruatkima te’n jail tlawhtute hi lo dawngsawngin an inkawm a. An inkawmnaah hian, jail tang an tam avanga thawktute an indaihlohna nasat avanga a tul anga under trial prisoner (UTP) thubuai rang zawka chinfel a nih theih dan turte, jail tang chhuak, chhunte bula letna tur nei lo leh harsa zawkte awm zawmna tur leh inenkawlna tur kawng dap dan turte an sawi ho.
Hei bakah hian, Mizoram Social Defence & Rehabilitaton Board te hmalakna leh scheme hrang hrang thlunzawm dan pawh sawiho a ni a, fel fai zawk a duan tura ruahman a ni.
Inkawmnaa tar lan a nih danin, Central jail-a leng zat hi mi 436 a nih laiin, tun dinhmunah tang mi 825 an awm mek a. Central Women jail pawh mi 96 tanna tura ruahman a nih laiin tang 214 an awm mek a. ND&PS Act hnuaia tang hi an tam ber a, ruihhlo kaihhnawih a harsatna siam an tam tih tar lan a ni bawk.
Dr Lalhriatzuali Ralte hi IG Prison Zarzokimi, Aizawl CJM Lalrochami Ralte, JMFC H.T. Lalmawizuala, SNO Mental Health Dr Robert L Khawlhring, DIO Dr Laldinpuii Ralte, CEO MSDRB Lalhlupuii Sailo leh R. Lalrinzuali, SDC, Aizawl leh official dangte’n an tawiawm a ni.