Haryana-a lirthei hal chhunga ruang pahnih kang chhe tawh tak chhar chuan India-a mipui thinrimna thlenin police-ten an chhui zui dan pawhin duhkhawp a hlawh lo.
Police chuan ruangte hi an thenawm, Rajasthan-a Muslim mipa pahnih, a hmaa an bo nia sawite an nih thu an sawi.
An chhungte chuan Hindu kal firfiak pawlten bawng tawlh rua puhin an that niin an sawi.
Bajrang Dal chuan an pha a, a chhuitu police pawhin chutiang niin an ring lo.
Haryana-a police chuan kar hmasa khan tual chhung miten Bhiwani district-a Barwas khuaah lirthei kang leh a chhunga ruang pahnih awm an hmu tih an hriat atangin an chhui tih an sawi.
Police hian ruangte hi tute nge an nih an sawi hmain lirthei hi Mahindra Bolero a ni tih an sawi a. SUV hi a hnuah mipa pahnih, Junaid leh Nasir ten Rajasthan atanga an bo hmain an khalh chhuak tih an sawi leh.
Rajasthan police thuneitu sang pakhat chuan ruangte hi Junaid leh Nasir an nih thu a puang a, an chhungte pawhin an nemnghet.
Engvanga zin nge tih hriat an ni lo va. An chhungte zinga pakhat chuan Nilaini zing hma takah ‘mi mal thil’ ti turin an chhuak tih a sawi.
“Zing dar 9:00 velah mi thenkhatin dawrah mi 8-10 velin mipa pahnih an sawisa tih an sawi a, car-a phurh zui an ni tih an sawi bawk,” tiin police hnenah thubuai thehluttu, an chhung zinga miin a sawi a. A titute hi Bajrang Dal member ngei an ni tih a sawi bawk.
Rajasthan police hotu sang chuan complaint an dawng a, kut tuarte phone an chhui a, switch off a ni tlat tih a sawi tih Indian Express chanchinbuin a tar lang.
Haryana-ah Bolero car kang hmuh a nih thu an hre ta a, Rajasthan police team chuan an chhungte nen an pan a. Thuneitu pakhat chuan an chhungte hian Haryana-a mi ‘an mi rinhlelh hming pawh an sawi’ tih a sawi.
Thah an nih chhan hi hriat a la ni lo va. “Nasir-a hian thubuai a la nei lo va, Junaid erawh chuan thil tawlh ruk thubuai panga a nei,” a ti.
Bawng talh hi Hindu sakhuaah phal loh niin state tam tak, Rajasthan leh Haryana-ah pawh khap a ni a. Lawi erawh phal a ni a, lawi leh sa dang zuarte hi Muslim an tam a, tun hnaiah Hindu miten bawngsa zuara puhin an sawisa fo thin.
Bolero-a ruang chharte pawh hi chanchinbu thenkhat chuan bawng thlavang hauhtuten a sa hralha puhin kut an thlak ta niin an tar lang hlawm.
Investigating officer Ram Naresh chuan thubuai ziah luhah bawng tawlh ruk ziah lan a ni lo tih BBC a hrilh.
“Ranvulh lam tihlan a awm lo va, kil tin atangin chhui a ni,” a ti.
Police hian mi pakhat, complaint luta a hming tar lan, Rinku Saini an man tawh a. Haryana mi niin taxi driver a ni a, bawng thlavang hauhtu a ni a, a chhungte chuan driver a nih bak inrawlhna a nei lo tih an sawi.
Police chuan mi dang pali an la zawng a, an an zingah hian Bajrang Dal member, cow protection task force-a tel thin, Monu Manesar pawh a tel.
Manesar-a hian YouTube-ah follower 2,00,000 chuang neiin bawng tawlhtute nena an inhmachhawn lai te, a chhanchhuah lai video-te a dah thin.
Tun tuma thubuai a awm hnuah hian video dah tharin inrawlhna a neih loh thu leh thil thlen lai hian heng laiah a awm lo tih a sawi.
Bajrang Dal leh Vishwa Hindu Parishad hruaitute pawhin an thlawp a. Anni hian thuthar lakhawmtute an kawmnaah bawng thlavang hauhtute chu ‘dik lo taka phih awh tum’ an nih thu an sawi.
Hetih lai hian thi chhungte chuan duh lohna lantirin an puh dangte pawh man thuai an phut.
“Monu Manesar-a man a nih hma chu kan kalpui zel ang,” tiin an chhungte zinga pakhat chuan The Hindustan Times chanchinbu a hrilh.