A khuhhawnna
Super Bowl halftime-a show ngan tak nei zo hlim hlawl Rihanna hi nikum 2022 khan kum 34 mi niin America rama mahni thawhchhuaha billionaire hmeichhe naupang ber nihna a lo chelh tawh.
Forbes-in kumtin a tihhhuah America rama mahni thawhchhuaha hausa ber billionaire hmeichhe zingah number 21-naah awmin kum 40 hnuai lamah amah chauh a ni nghe nghe.
Pop star leh beauty mogul ni bawk hausakna hi $Billion 1.4 vel anga chhut a ni a, August 2021 pawh khan Forbes chuan kahwvela hmeichhe musician hausa berah a lo tarlang tawh bawk.
Heti ang dinhmun thleng tura a beihna leh tumruhna erawh sawi hmaih a ni fo ang lawi a, mahse amah hrechiangtute leh thawhpui te erawh Rihanna taimakna leh inpekna hi hahipin an sawi fo thin a ni.
Kum 2005 a ‘Pon de Replay’ hla hmanga rimawi khawvel dailuttu hian music industry ah mai ni lo, beauty industry-ah pawh huhang na tak a nei mek a, company lian leh langsar- Fenty Beauty cosmetics, Fenty Skin leh Savage X Fenty lingerie line te chuan sum an thawhchhuahpui nasa hle.
Kum 2019 khan The New York Times-in a kawmnaah Rihanna chuan a hausakna hi awmze nei taka kalpui a nih thu sawiin, “Ka sum leh pai te hi ka ka tan a ni lova, midang mamawh zawkte tanpui nan leh chhawm dawl nan ngaihtuahna ka seng reng thin,” tiin a sawi.