India khawpui, Delhi-ah chuan motorbike taxi khap a ni dawn a, company hrang hrang – Uber, Ola leh Rapido te tan chuan thil pawi tak a tling dawn.
Sorkarin hriattirna a chhuahah chuan mi mal two-wheeler-a passenger phurh chu Indian dan bawhchhiatna a ni.
Hriattirnaah hian ‘digital provider… hetiang kalpui mekte’ chuan an tilui a nih chuan Rs. 1,00,000 aan chawi dawn tih tar lan a ni bawk.
Company-te chuan sorkar thuchhuah chungchangah hian engmah sawi an la nei lo.
Indian sang tam tak hian kawngpuiah lirthei a tawt lutuk avanga kal a muan thin avangin motorbike taxi hi an hmang nasa hle a. Mi za telin hna an neih phah a, private motorbike hmang hian awlsam zawk mi sang tel an veivah phah thei bawk.
Hetih lai hian Motor Vehicles Act-ah chuan mi mal lirthei chu India ramah sumdawnna atan hman theih a ni lo.
Indian Express chanchinbuin Delhi-a khap a nih dawn avanga a khalhtu a kawm thenkhat chuan an tan tuna an tih bak sum lak luhna tur hmuh a hautak dawn hle tih an sawi hlawm.
Tun tum hi dan avanga motorbike taxi leh a khalhtuten harsatna an tawh vawi khatna a ni lo thung.
January khan Maharashtra state sorkar chuan Rapido hnuaia motorbike taxi license a pe chhuak duh lo va, dan angin license, himna leh a chuan man chungchangah an tling (qualify) lo niin an sawi a. Bombay High Court pawhin company chu licence an neih hma chu an hna kal lai titawp turin a ti bawk.
Rapido hian Supreme Court-ah thlen zuiin anni hian high court-a ngaihtuah tur bawkin a thawn letsak thung.
Eizawnna atana hmangtu tam tak pawhin hetiang taxi hi an duh lo bawk a. December khan Telengana-a gig worker pawl chuan sorkar hnenah motorbike taxi atana mi mal lirthei hmante laka hma la turin an lo ngen tawh.
Allied Market Research-in nikuma report a tihchhuah hnuhnung berah chuan India-a motorbike taxi market hlut zawng hi $ maktaduai 50.5 zet a nih thu leh kum 2030-ah phei chuan $ tluklehdingawn 1.5 vel a tlin hman an ring.
“Hetih rual hian dan hmanga dodalna leh vantlang inkalpawhna enkawltute chet thawhna avangin a market than dan tur chhut lawk hi danglam thei a ni,” tiin report-ah hian an tar lang bawk.