India hmeichhe cricket team chuan Women’s T20 World Cup semi-final an lut a. Duckworth-Lewis-Stern method hmangin run nga in ruah in a tihbuai inkhelah Ireland an hneh.
Thawhtanni khan India leh Ireland hi Gqeberha a St George’s Park-ah an inkhel a. Ireland in chak turin run 156 siam an mamawh. Over 9-naah run 54 siam a wicket hnih chauh an hloh laiin ruahin inkhel a titawp a. Irish team in an mamawh run bituk zat pha lovin run nga in India an chak.
Hnehna an chan avangin India hian Group 2 atang England zuiin semi-final hi an lut.
A awlsam lo
Vuak hmasak thlang India in run 155 siamin over 20 chhungin bat hmangin an che chhe lo. Chutihrualin Gqeberha-ah thli a thaw nasa a, India in an vanneihpui tel.
India tana ball 56 hmachhawn a run 87 siamtu Smriti Mandhana chu tum li lai Ireland in catch out theihna an nei a, nimahsela thli a thawt nasat avangin an ‘drop’ leh thin.
Ruah in inkhel a tih khaihlak hma hian thli a nasat avangin Irish fielder ten a belhkhawmin vawi 5 ngai ‘drop’ an nei a, India innings tluchhe tur lakah an vanduai phah.
Mandhana in a remchang neih a chhawr hle a, six vawi thum a vuak bakah four runs vawi kua a vaw bawk.
Ireland in India run bituk zat an umin bul an tan chhia a, run 1 chiah an la siam tihin Amy Hunter run out an tuar a. Renuka Singh Thakur chuan ball li a vawm leh hnuah Orla Prendergast wicket a la leh bawk.
Ireland tan Gaby Lewis chuan ball 25 atang 32 siamin captain Laura Delany chuan 17 a siam bawk a. DLS Method-ah run 60 siam a chak thei tur an nihlaiin 8.2 overs-ah run 54 bak an tlin ta lo.
Group 2-ah England an la sang ber thova, net run rate an neih that zawk avangin nimin khan Pakistan lakah an chesual hle a nih loh chuan group winner an ni dawn a. Semi-final ah Australia an hmachhawn loh phah thei dawn.
India opener Smriti Mandhana chuan, “Inkhel ka hmachhawn tawhah chuan a hautak ber pawl a la ni. Pitch awmdan vang ai mahin ball kha a kal chak em em a, thli thaw nasa khan inkhelh a ti har bawk a, kan rinlawk aiin inkhelh a harsa. A tir ball 30 phei kha chu a harsa hle.” tiin a sawi.