Aizawl : PC party President Vanlalruata’n “Mizoram state budget session neih mêkah SEDP board hman atan supplementary demand-ah Rs nuai 358.02 dil belh a ni a, budget thar turah hei hi tarlan a ni chuang lo” a ti.
Nimina PC party hruaitu ten Mizoram budget 2023-2024 an thlirhonaah he thu hi PC President chuan a sawi a. “Kan sum dinhmun chhiat chhoh zel laiin siamṭhat tumna hmuh tur a awm lo” a ti.
PC President chuan “Lanmawi tumin budget diklo pharh zel a ni a, sum hman ral thlawn (revenue expenditure) tur hriat lâwk sa tam tak budget estimate-ah tarlang lovin hetianga thup ṭhen hmang hian pawisa chuangliam (revenue surplus) nei tur anga intarlan ṭhin a ni” tiin, “Hetiang budget diklo siam luih hian kan sum dinhmun a tichhe zual zel a, a pawi takzet a ni,” a ti.
Vanlalruata chuan “kan budget hmanlai (2022-23) hi a tirah hlawh takngial pawh indaihlo tura duan a nih thu kan sawi thin a, tunah a nihna lo lang chhuak tain supplementary demand-ah hlawh atan Rs vbc 215.81 lâi dil belh a ni a, sum dil belh hi a vai phei chuan Rs vbc 3,265.69 niin, a tam tham hle a ni,” a ti a. “Hetianga lanmawi tuma budget diklo siama, tam tham tak tak siamrem (reappropriate) ngai ṭhin hi tihtawp a ṭul tak meuh a ni,” a ti bawk a ni.