India hmar chhak state zinga pathum – Manipur, Meghalaya leh Tripura-te chuan nimin khan state puitlinga hlan kai an nih champha (Statehood Day) an hmang.
Kum 1972 khan heng state pathumte hi North Eastern Region (Reorganisation) Act, 1971 hmangin state puitlinga hlan kai an ni.
Prime Minister Narendra Modi chuan Twitter kaltlangin lawmpuina thu a tar lang hlawm a. “He Statehood Day-ah hian Meghalaya-a ka unaute chibai ka buk a che u. He state hi a ngilneihna leh unauna thinglung avangin hriat a hlawh hle a. Meghalaya thalaite hi an paukhauhin an themthiam a. He state hian hun lo kal zel turah hmasawnna nasa tak a hmuh ngei ka beisei,” a ti.
Tripura mipuite pawh Modi hian kawng hrang hranga an thiamna avangin a fak a. “Tripura mipuite hi Statehood Day-ah hian duhsakna sang ber ka hlan a. An hnamzia leh an rilru thatna hi India ram pumah ngaihhlutin a awm a. He state hian kawng hrang hrangah hma a sawn a, chutiang zela kal tur chuan ka duhsak,” a ti.
Manipur lawmpuina thu pawh tar langin prime minister chuan, “Manipur mipuite Statehood Day chibai u le! India chuan Manipur-in ram hmasawnna atana a thiltih zawng zawng hi a chhuang a. Manipur hi thil thar tichhuaktu leh sport lama sang tak a ni a. He state hi a kal zelna turah duhsakna sang ber ka hlan a ni,” tiin Twitter-ah a tar lang.