A contract lian tak mai neihlai titawp tura inpekna inremna an neih hnuah NBA All-Star vawi 9 ni tawh guard Russell Westbrook chuan Los Angeles Clippers a zawm dawn niin a agent chuan a sawi.
Westbrook hi a contract neitu ni lai Utah Jazz nen Dollar maktaduai 47 man hu kum khat la awm chu ti ral turin an indawr a. Inremna neiin Thawhtanni zan khan Jazz hian a contract chu an tiral tih an lo sawi tawh. NBA Most Valuable Player ni tawh Westbrook hi Los Angeles-ah bawk kir leh a tum.
Westbrook hi kumin NBA trade deadline a thlen dawn khan Los Angeles Lakers chuan Jazz hnenah hian team pathum inremnaah telhin an kaltir a. Jazz lamin an team a chelhzui lovin a contract tihral a, salary cap ah hmunawl neih hnem zawk an duh.
Tunhnaiah Chicago Bulls, Washington Wizards leh Miami Heat te nen inbiakna an nei vek a. Nimahsela NBA Playoffs a che tha tura ngaih team an nih bakah amahin a seilenna Los Angeles a chen chhunzawm a duh avangin Clippers lam hi a awn ta a ni.
Clippers hian tunhnaiah kum 34 mi Westbrook hi an roster a neih an pawi ti lova, an team-ah hian Oklahoma City Thunder tana a khelhpui thin Paul George chu an star player zing ami a ni mek.
Hetihlai hian free agent guard Patrick Beverley pawh Los Angeles Lakers in Orlando Magic hnena an kaltir hnuah a contract pek tlak a ni a. Team nei lova a awm hnuah Chicago Bulls chuan an lalut ve bawk.