Kartawpa Brazil-a São Paulo state chhung tuipui kam khaw eng emaw zata lei min avanga thi chu mi 44 an tling ta.
Mi 40 chuang an chin hriat lohvin an la awm mek bawk.
Tual chhung mite chuan chhanchhuah hna thawktute chu chirh karah dam zawn hna an thawhpui mek.
São Paulo khawchhak lama tuipui kamte hi ruah tam tak a sur hnuah tlang atangin lei leh lung nghet lote a tawlh vak a, mi 750 chuangin an in an chân.
Meteorologist-te chuan darkar 24 lek chhungin Bertioga khawpui huam chinah ruah mm 680 (26 inches) chuang a sur hman niin an sawi.
Bertioga hmar lam km 80 vela hla, São Sebastião khua phei chuan ruah an dawng tam zual a; mahse, mi pakhat chiah thi a awm hlauh thung.
Thi zinga tam tak hi naupang an ni a. Hmeichhe naupang pakhat chu tonne hnih zeta rit lung tlain an in a delh avangin a thi.
Hmeichhe dang pakhat pawh thing tluin a delh a. Mi dang tam zawk erawh awihpanga lei tawlhin a chhilhte an ni.
Meteorologist Marcelo Seluchi chuan khaw lum tak nen ‘khaw awm dan uchuak tak’ hi a thleng tih BBC News Brasil hnenah a sawi a. Ruah bakah hian khaw lum uap churh chuan ruahte chu a kal bo muan phah niin a sawi.
Awihpanga ruahtui tam tak luang chu in sak nghet lo tak takte chuan a dawl zo ta lo hlawm a ni.
Brazil-ah hian mi maktaduai kua vel chu lei tawlh leh tui len theihna hmuna cheng an ni.
Ruah hi ni rei vak lo a la sur dawn tih sawi lawk a ni a, in nghet tawk lova chengte chu himna ngaihtuah tura tih an ni.
Chhiatna thlen hun lai hi an carnival hun lai a ni a, chhungkaw tam tak chu tuipui kama intihthawven tuma an awm tam lai a ni.
Lei minin a hnawh kawng tam tak chu tihtlang leh tawh a ni a, mi thenkhat chu puihna hna thawh a chak zawk theih nan an ina haw tawh tura tih an ni hlawm.
Lei min leh tui lian hi Brazil-ah hian thil thar a ni lo va. Nikum mai pawh khan Rio de Janeiro hmar lam, Petrópolis-ah chuan ruah tam tak sur avanga lei minah mi 230 vel an lo thi tawh.