Aizawl : Chapchar Kût lawm tura inpuahchahna kal mekah Champhai District Chapchar Kût organizing committee, an Chairman, Champhai Bawrhsap James Lalrinchhana hova thukh- awmin, Chapchar Kût-ah Zofate inpumkhatna leh hnam ziarang lam hawi a tam thei ang ber lantir tura ruahmanna siam ni se, an ti.
Chapchar Kût hi Champhaiah chuan chawhma dar 10:30 atangin Zotlang Sports Stadium-ah an lawm dawn a. Organizing committee chuan kut-a tel tur mipuite pawh Mizo ziarang lang tam thei ang bera inthuam turin an ngen a. Hnam ziarang pholang thei tur stall siam tura hmalak an rel bakah kût chhimtu naupang zingah hnam thuama inthuam nalh an thlan dawn bakah Chapchar Kût Miss leh Mister an thlang dawn bawk a ni.
Champhaia Chap- char Kût lawmna hi Local cable TV 2, CCN leh LCN ah te live-a tihhchuah an tum a, a hmunah ei leh in lam zawrhna food stall 6 siam an rel bawk.
Champhai Bawrhsap chuan pipute sulhnu nundan tha leh Zonun zemawite chhawmnun zel a pawimawh thu sawiin, Chapchar Kût lo thleng tur chu pipute ziarang phawkchhuak thei ang ber leh hlim tlang thei ang bera lawm tum a nih thu a sawi a. Chapchar Kût chuan mimal leh khawtlangah inpawhna nasa zawk a thlen ngei a beisei thu a sawi bawk a ni.