- Lr Lushai
Space age ah kan cheng tawh a, internet lam ah nise keini ram kilkhawr ber thleng pawh in 5G in min rawn luhchilh tan mek a ni a.Chutih lai a Ham/GMRS radio ( Mi nawlpui in Walkie Talkie kan tih mai hi) lo buaipui chu a va tunlai tawh lo ve kan ti maithei.Hetiang ngaihdan nei kan lo awm anih pawh in a awmlo hranlo e.Mizo Mipui nawlpui hian heng radio pawimawhna leh a tangkai zia hi kan hretthiam phak lo in a rinawm.
Mizoram a dawr leh godown inbiak pawh nan te,Pawl leh Kohhran inkhawmpui lian a traffic incharge(Traffic police nilo in Civilian) a an dah ten inbiak pawh nan a an hman ang walkie talkie hi FRS (Family Radio service)/(General Mobile radio service)an ni tlangpuia.Heng walkie talkie te hi a watt pek chhuah( Maximum 5 watts) a hniam avang in hmun hla tak tak inbiak pawh nan a hmantlak loh a.A tlangpui in heng walkie talkie te hian khawpui chhung Building lian pui pui a din tamna ah chuan km 1 emaw km 2 bial chhung vel a hmantheih a.Metropolitan city Tower sang pui pui awm lohna Aizawl khawpui ang te leh Khawpui pawn radio wave lo block tu awmlohna ah chuan km 10 bial chhung ah pawh a hmantlak a ni.A ram leilung pian hmang a zir in hei ai a thui daih te pawh hi a hman theih thin a ni.
Heng kan sawi tak FRS/GMRS radio hmang tur hian license neih kher a ngai lo va.Amaherawh chu Ham radio ang chi hman dawn erawh chuan Ministry of Information hnuai a Wireless Planning an Coordination (WPC) atang a Ham radio hman phalna license neih hmasak a ngai a,license nei tur hian exam paltlang te pawh a ngai a ni.
A technical lam thil,india sorkar in eng frequency spectrum nge citizen tan hman a phal tih te leh High frequency,Very High Frequency,Ultra High Frequency radio kalphung leh a chhevel zawng zawng kan sawi fiah dawn chuan mi nawlpui tan hriatthiam a har dawn a.Chuvang in Enge atangkai na tih lam zawk hi sawi zui dawn teh ang.
ENG ATAN NGE RADIO/WALKIE TALKIE CHU KAN HMAN TANGKAI ANG?
Kum 2005 kum a USA chhim lam state hrang hrang Hurricane Katrina in a nuai chiam tum te,tun hnai deuh a Kerela state in tuilian nasa tak a tawrh tum te khan mobile signal tower bak ah power supply line a chhiat nasat avang in mobile phone a hman tlak loh a.Khang chhiatna thlen tum khan Ham radio operators ( Ham radio license nei te hi Ham Radio Operator emaw Amatuer Radio Operator ti in an sawi thin) te chanchhuah hna thawh na kawng a inbiakpawh nan an tangkai takzet a ni.Wireless communication anih avang in thlipui leh khuarel chhiatna hrang hrang ten Ham radio hmang a inbiakpawhna hi a tibuai ve phak lo a ni.
Kan sawi tawh ang khan dan ang tak a kal dawn chuan Ham Radio bik hi chu a radio leitur ringawt pawh a License neih ngai leh license nei tur pawh a exam ngai anih piah lam ah kan state ah hetiang lam buaipui tu sawrkar agency kan la nei ve lo va.Kan state chhung ah regulate/control tu tur an la awm miau loh avang in awlsam tak in Amazon kaltlang in lei maitheih a ni a.China siam Baofeng UV5R te hi ham radio chak tha tak man tlawm ( cheng 3500 vel bawr)bawk si a ni.Baofeng UV5R hi chu a chak avang antenna tha tak vuah phei chuan thui tak tak km 50 chuang pawh repeater tel lo pawh in a biak pawh theih a ni.Baofeng hi Dual band anih ang in VHF leh UHF a hman kawp theih a.Ham radio kan hmang kher lo a nih pawh in License tel lo va hman theih GMRS radio/walkie talkie hi khuarel chhiat rup na a thlen chang in a tangkai thei hle dawn a ni.Kan hriat tel atan a tha chu GMRS hi UHF frequency hmang anih vang in a radio wave a chak a building lianpui pui ang chi te pawh a paltlang thei a ni.
Mizoram hi lirnghing chungchang lam zirmi seismologist te chuan lirnghing na tham tak a thlen thut theih reng na lai zone a awm kan nih thu an sawi kan hre fo tawh thin a.Lirnghing hi engtik hun ah nge a lo thlen dawn sawilawk theih a nih miau loh avang in lirnghing in a ken tel chhiat rup na lak a lo inven lawk dan tur hi hriatthiam har tak a ni.
Kan sawi tak ang in khuarel chhiat rup na a lo thlen in mobile hmang a inbiak pawhna power line leh tower te a tihchhiat tel thin avang in chanchhuah hna thawhna kawng a thil pawimawh ber pakhat inbiak pawhna kawng ah mobile phone a tangkai lo hle a.Chu ai chuan kan sawi tak awlsam tak a kan lei mai theih Walkie talkie /GMRS radio hi a tangkai hle dawn a ni.Heng Low watt radio FRS/GMRS walkie talkie hmang hian thui tak inbiak pawh theih loh mahse Repeater nen a kan link chuan thui tak tak a inbiak pawh theih a( FRS hi chu repeater nen a link ve theih lo a GMRS erawh a theih thung).Mizoram ah ngei pawh hian Amatuer Radio Club pakhat a ding ve tawh a.An ni club hian repeater khawl Aizawl a hmun sang lai ah dah in chumi hmang chuan Aizawl khawchhung mai bak ah thingtlang khaw tam tak Aizawl atanga KM 200 chuang a hla te pawh an be pawp thei a.Amaherawh chu an member te tan chauh an repeater hi hman theih a ni thung.
Khawthlang ram (Sap ram) ah chuan Repeater hi a club ang leh mimal ang te pawh in an bun thleh thluah a.Heng repeater te hi a duh apiang tan a va hman theih mai tur in a dah thin a ni.
Kan ram khawpui a bik in Aizawl chep zia kan hria a.Khuarel chhiatna liantham lirnghing emaw cyclone te lo tuar palh ta i la kan mobile phone tower ho hi an hmantlak dawn loh a.Chung hun ah chuan kan sawi tak Ham/GMRS radio Walkie talkie hi chanchhuah hna thawhna kawng a inbiak pawh nan atangkai thei hle dawn a,chuvang in heng GMRS radio hi thil man to tak a nilo bawk nen a thei chuan kawl fur mai i la chhiat rup na a thlen hun kher lo ah pawh hman tangkaina tam tak a awm a ni.
Amatuer Radio lam a tui leh hriatchian duh nei chuan Facebook Group >Amateur Radio Lam a Tui Mite tih group hi i lo join ve dawn nia.