Sorkarin tunhnaiaa E. Lungdar-a Block Agriculture Office (BAO) a dah chungchangah thudik tawklo vawrhdarh an awm nia sawiin, N. Vanlaiphai-in E. Lungdara BAO awm tura sorkar Gazette-ah pawh tihchhuah tawh chu diklo takin an chuhpui niin an sawi.
E. Lungdar VC thuchhuahin a tarlan danin E. Lungdar-ah hian kum 1962 atangin Agriculture department te an awm tawh a, Circle hmun niin, Agriculture Extension Officer (AEO) leh staff engemawzah an awm tawh thin. Tun thlengin Agriculture department hian E. Lungdar-ah office building, staff quarters, kudam etc. a la nei reng a, E. Lungdar R.D block huamchhunga Agriculture circle awmchhun a ni.
January ni 18, 1974-ah E. Lungdar chu RD block Hqrs., ni tura hawn niin, tun thlengin a la ni a. E. Lungdar VC chuan “Hun lo kal zelah tunhmaa sorkarin Agriculture-ah Circle, SDAO, SMS anga function thin leh tun- hnaia Agriculture SDAO hmuna puan thar te chu Mizoram Agriculture Service Association-in service rules siamtha tura sor- kara an thlen hnuah SDAO, Circle leh SMS post te chu nuaibo vekin, Block Hqrs-ah BAO chu fu- nction vek tawh turin cabinet meeting-in thutlukna a siam” an ti a. “Sorkar Gazette-ah pawh tarlan niin, Mizoram sorkarin notification a tihchhuah phek 8-na serial no 13-ah Block Agriculture Officer (BAO) chu E. Lungdar khuaa awm tura chiang taka ziah a ni” an ti.
E. Lungdar VC thuchhuah chuan “Mizoram sorkarin Gazette a tihchhuahah BAO awmna tur khua E. Lungdar lo khawdang hming E. Lungdar RD block huamchhungah ziahlan a awm lo” a ti a. Mizoram sorkarin gazzete a tarlan anga order chhuah hmasakberah T. Lalhmingmawia, SDAO Zawlnuam chu E. Lungdar-a Block Agriculture Officer tura tih a nih thu an tarlang.
“E. Lungdar-a BAO dah chu duh lovin N. Vanlaiphai khawtlang hruaitute leh party hruaitute Aizawlah tlan thla nghalin sorkarin T. Lalhmingmawia, E. Lungdar BAO atana a lo dah tawhna order chu diklo taka sut tirin tunhma pawha E. Lungdar AEO a lo awm tawh N. Vanlaiphai khawpa Var- zama chu E. Lungdar BAO atan dah a ni” E. Lungdar VC thu- chhuah chuan a ti a. “A ni hian hunreilote N. Vanlaiphai atanga thawkin, sawn a nih leh hnuah tunah hian Vabeilaiku Chozah chu E. Lungdar BAO atana dah leh a ni” tiin, N. Vanlaiphai khuain Block Agriculture Office chu diklo takin an chuhpui niin an sawi.
E. Lungdar VC chuan N. Vanlaiphai NGO Co-ordination-in thuchhuah an siama N. Vanlaiphai BAO office sakna atan Rs 64,00,000 hmu anga an tarlan pawh thu diklo a nih thu sawiin, Rs 64,00,000 chu Wa- rehouse sakna atana sanction a nih zawk thu an sawi bawk.
E. Lungdar VC chuan “thu dik tawklo tanchhana N. Vanlai- phai khuain E. Lungdar khuaa sorkarin BAO a dah min chuhpui tlat hi pawi kan tiin, NGO Coordination Committee hminga tidanglam leh tura diklo taka sorkar an nawr hi hriatthiam har kan ti hle” an ti a. E. Lungdar BAO chu function tir thuai tura sorkar an ngen thu an sawi bawk a ni.