Premier League club Manchester United chuan tun nipuiah neitu thar hnuaiah lo awm hman pawh nise nasa taka player bazar a chet an tum lo niin British chanchinbu thenkhatin an sawi.
United hi tunah hian lei tum an awm nual a, heng zingah hian Qatari banker Sheikh Jassim Bin Hamad Al Thani chu langsar in sum hlawm thehchhuah hnem ber tur a ni dawn niin an ngai.
Chanchinbumiten an ngaihvennaah United neitu tharte hian club chu tunhma anga khelmual chhung leh pawn a hlawhtling nih tir an tum a. Neitu thar an awm chuan player lakluh a squad tihchak nan insen an tum nia sawi an ni.
Nimahsela tupawh a neitu thar hi nise an che chiam thei rih dawn lova, a chhan chu Financial Fair Play dan an palzut loh nan fimkhur taka an chet a ngai dawn.
United hian nikum nipui khan Pound maktaduai 200 chuang player lakluh nan an hmang a, January thla ah loan in player pathum an hawh bawk.
Tun dinhmunah United in sumdawnna thil leh inkhelh ni atanga an sum lakluhte chu la kaltluang vek mahse Champions League football an khelh loh bakah player hralhna man an tel tam loh avangin FFP dan bawhchhe lo tura an fimkhur a ngai niin an sawi.