Aizawl : Serchhip district Bharat Scouts & Guides-in nimin khan World Thinking Day pualin Chawngbuangi Memorial School, Din- thar veng. Serchhip-ah hun an hmang a. District President, Bharat Scouts & Guides, Serchhip Bawrhsap Nazuk Kumar-i’n a hmanpui.
World Thinking Day hi Guide Captain J. Lalbiakmawii kaihhruaiin Girls Scouts ten Scout & Guides Flag pawtpharhin an hawng a. He hun hmanpuitu District President, Bharat Scouts & Guides Nazuk Kumar chuan “Scouts & Guides hmalaknain India chauh ni lovin khawvel huapin min thlungkhawm a, hnam tinte inzahtawnna te, inhriatthiamtawnna leh thil tha ngaihhlut tur dik chawisang tura thawhhona te min pe” a ti a. “Tunlai khawvelah pawh khawvel pum hua- pa harsatna, mitinten rilru hmunkhat pua kan hma- chhawn tur tam tak a awm zel a, khawvel muanawm zawk leh nuam zawk din turin Scout & Guides te hian nasa takin hma a la reng a ni” a ti.
Nazuk Kumar chuan “Unau vek kan nih anga a tul ang zela intanpuitawnna, keini pawhin tunhnaia Myanmar raltlan kan phak tawka kan lo tanpuinate, Europe khawmual lama indona avanga unau an intanpuina ang chi te leh kan chenna khawvel thianghlim taka vawng tura hmalaknate, hriatna leh thiamna lama hmasawn zel tura beihna te leh hmalakna duhawm tak tak kan neih mekte hi chhawm nung zel ila” a ti a. “Khawvel ram tina kan unau kan hmalak ang bawka hma la mek te leh kan hmalakhona hlawk zia leh tangkaiziate hre reng chungin he Thinking Day hi i hmang ang u”, tiin kalkhawmte a sawm a ni.
Serchhipa Little Flower Convent School, Chawngbuangi Memorial School leh Millenium High School, Chhiahtlang a Scouts & Guides ten hun an hmang a, Dist. Assistant Commissioner Vanlalnunziri’n Scouts & Guides dintute nupa chan- chin tlangpui a sawi bawk.
World Thinking Day hi kum 1926 atanga hman tan niin, Scout & Guides dinchhuaktu Lord Robert Biden Powell leh a nupui Lady Baden Powell te piancham (an nupa hi an piancham a inang) February ni 22-ah amahni chawimawi nana hman thin a ni a. Kuminah pawh hian Mizoramah pawh district hrang hrangah he ni hi hman a ni.