Election Commission-in a kaihhruai zawk chu ‘Shiv Sena dik tak zawk’ tia thutlukna a siam tuk lawkah Eknath Shinde chu party chief atan Thawhlehni khan an party thutkhawmah puan a ni.
Commission hian Maharashtra-a Sena phir mekah Shinde kaihhruai lam chu Uddhav Thackeray-a kaihhruai aiin party dik tak zawk tih nemnghetin an party inthlan chhinchhiahna, ‘bow & arrow’ pawh an chan turin a ti zawk a ni.
An party national executive an thutkhawm hma lawkin Sena hian chanchinbumite hnenah an party chu ‘Shiv Sena’ tia sawi tur leh ‘Shinde camp’ tia sawi tawh lo turin an ti.
Thutkhawmah hian MLA, MP leh hruaitu eng emaw zat, Thackeray-a lak atanga an chhuah tirh atanga Shinde-a lama la awmte an tel.
Shinde-a’n a kalsan tak, chief minister hlui, Thackeray-a chu Supreme Court-ah zualkovin commission-in thutlukna a siam chu hnawl turin a ngen mek a. Court chuan Nilaini chawhnu dar 3:30-ah he thu hi an ngaihtuah ang.
Supreme Court-a inbeihna a kal mek lai hian Thackeray-a hian a lama la tangte tihphur zel tumin a bei mek zel a, an party huhang tlahniam mek zel tharthawh leh tumin a tang hle a, Shiv Sainik camp a buatsaih mek a ni.
Sena hian Maharashtra-ah hetiang camp hi zau takin a kalpui a, Thackeray hian bul tan thar leh nan ‘Shiv Shakti Abhiyan’ a kalpui a, hei hi a bulthut atanga an worker-te rilru chawh thawh thar leh a tumna a ni.