Shah Rukh Khan-a’n a film thar leh hit ber mai, ‘Pathaan’-ah Kashmiri Kani kawr a ha a, hei hian ngaihven a hlawhin, a siamtute lamin order an chhang seng lo.
Kashmir kutchhuak craft te hian tunhnai atang khan thawh tur an nei tlem tial tial a, an sudawnna leh sum siamna in a tawrh chhoh mek laia SRK-a kawr hak mawi ti leh tha ti pung thar thut chuan market-ah nghawng duhawm nei chhovin, Kashmir craft industry tan a lawmawm hle.
SRK hian Kani kawr hring mawi tak a hachhuak a, a inhmeh bakah mit a lak em vangin mi tam takin a kawr hak leh desing ang hi neih ve ngei tumin order an siam chur chur mai a, heti ang lam buaipuitute tan khua a eng chho ta a ni ber.
Kashmir-a Kanihama khua hi Pashmina leh Kani shawls siamchhuahna leh chawrchhuahna a ni a, an shawl siam te hian hlut a hlawhin ramchhunga milar leh langsar tak takte’n an vawrh lar hle a. Prime Minister Narendra Modi, Bollywood actor Amitabh Bachchan leh midangte pawhin an hachhuak thin a ni.