Aizawl: Khawzawl Krishi Vigyan Kendra (KVK) chuan nimin khan Rabung khuaa Tomato chingtu chhungkaw 68-te tomato chin leh enkawl dan an zirtir.
Inzirtirna hi KVK Head & Senior Scientist Dr. Malsawmkimi’n kaihruaiin KVK SMS (Agronomy) Dr. Om Prakash-a’n tomato ching tura hriat tur pawimawhte zirtirin zawhna leh chhanna hun te hman a ni.
Lo neitute chu IARI & IIHR NEH-in tomato leh carrot chi an sem nghal a. Chawhnu lamah tomato chingtuten harsatna an neihte an huanah kalchilhin enpui nghal an ni.
Khawzawl KVK hian tun hnaiah Skilled Training for Rural Youth (STRY) hnuaiah Tuipui khuaah pa khawi an lo zirtir tawh a; Khawzawl khuaa mi eng emaw zat hnenah leitha siam dan leh khuai khawi dan an zirtir tawh bawk a. Chhawrtui khuaa kuthnathawktute hnena chana chi variety PB-89 an pek chu tun lai hian an seng tan mek a. Khawzawl KVK hian kuthnathawktute harsatna tawh tanpui turin an inhawng reng tih an sawi.