COVID-19 kai a hlauh em avangin Gurugram-a Chakkarpur venga cheng nu pakhat chuan a fapa nen pawn chhuak miah lovin kum thum chhung zet a lo inkhungpui.
He thil hi hmeichhe pasal, mi mal company-a engineer, Sujan Majhi-a’n Chakkarpur police post-a thawkte a hrilh hnuah an hre chhuak chauh a ni.
A pasalin a ngen angin police, damdawi lam thuneitu leh child welfare department team chuan Thawhlehni khan in hi an pan a, kawngkapui ber tichhiain Munmun Majhi leh a fapa kum 10 mi hi an la chhuak ta a ni.
An lo tawmna inah chuan thawmhnaw, sam, bawlhhlawh, vaivut leh ni tin mamawh ningnawi a lo inchap darh neih nuaih tawh a ni.
Mipa naupang nu hian amah leh a fapa sam chu an awmna inah chuan a tan mai a. Ei leh in pawh gas stove hmang lovin induction (heater) hmangin a siam a. An in chhunga hnawk chu kum thum chhung zet pawn lama paih a ni tawh lo va, tumahin an tlawh lo bawk.
Naupang hian an bang chu a lo chei râng nasa hle a, pencil chauh erawh a lo hmang thung a. Kum thum chhung zet ni êng an hmu tawh lo bawk.
Mak tak maiin an thenawm khawvengte pawhin he inah hian nufa an khawsa tih rin ngaihna reng reng an hre lo a ni.
Police thuneitu sang pakhat chuan a nu hian Covid-19 kha a hlau tak zet a, pawna an chhuah hlek chuan a fapa kha thi turah a ngai tlat niin a sawi.
Kum thum chhung zet an nufaa an inkhung hran chhung hian a pasal pawh luh a phal lo va. Inkharkhip hmasak ber a zawh hnu, kum 2020-a pisa kai tura an pa a chhuak chu an ina luh hi a phal ta lo bur mai a ni.
Majhi-a hian a nupui leh a fapa a biak theih dan awmchhun chu video call a ni a. In luah man a pe a, electric bill pawh pein an fapa sikul fee pawh a pe vek a, ni tin mamawh thil leh thlaite pawh leiin kawngkapui kawtah hian a nupuiin a lak turin a chhawp mai thin.
Nufa chhanchhuah an nih hnuah hian civil hospital panpui nghal an ni.