Mizoram Pradesh Congress Committee (MPCC) President Lalsawta chuan sorkarna an chang a nih chuan an danglam dawn a, an danglamna chuan Mizoram hi dinhmun tha takah a siam dawn tih a sawi.
Nimina Aizawl District Congress Committee buatsaihin Aizawl City Block Office Bearers Meeting chu Hotel Ritz ah neih a ni. He hun hmanpuitu Congress President Lalsawta hian, sorkar satliah siam hrim hrim hi an tum a ni lo a, sorkar tha siam ngei erawh an tum tih sawiin, “Kan danglam tawh dawn a, kan danglam a nih loh chuan sorkarah mipuite tan beisei tur a awm dawn chuang lo. Kan danglamna chuan kan ram hi dinhmun tha takah a siam ang,” a ti.
Lalsawta hian Pathian leh mipui zarah sorkarna an chang a nih chuan football, cricket, boxing, hockey, volleyball leh infiamna dang dangah Catch Them Young atanga bul tanin, infiam mi hlawhtling India ram pum huap leh khawvel huapah neih theihna turin tan lak hi an tum thu a sawi.
ADCC Vice President Lalhmingthanga Pachuau kaihhruai inkhawmah hian MPCC Vice President Lal Thanzara leh Lalrobiaka, Ex-MLA & President, ADCC ten thu an sawi bawk.