Italy a league hmahruaitu ni lai Napoli president Aurelio De Laurentiis chuan an player pawimawh pahnihte chu chelh chhunzawm theih a inbeisei thu a sawi a, contract thar ziahpui an tum tih a sawilang.
Tun season-ah Partenopei tan Victor Osimhen leh Khvicha Kvaratskhelia te an pawimawh hle a. League match vawi 23 an khelh tawhah point 15 a hma an hruai fal theihna chhan lian tak an ni a, kum 33 chhunga a vawikhatna atan Scudetto an la dawn niin a lang.
Napoli tlarhmaah Osimhen leh Kvaratskhelia te inkawp hian an pahnihin goal 49-ah chiang taka inrawlhna an nei tawh a. Hei vang hian Europe club liante ngaihven an hlawh.
De Laurentiis chuan an player-te hi chelh theih loh chin nei dawn mahse contract thar ziahpui an tum tih a sawi.
“Kan player tharte hian an rintlak tih chiang takin an tilang tawh. Ka lawmna em em chu he team hi player pahnih khat chauh vanga che tha a ni lo. Osimhen leh Kvaratskhelia te kan neih bakah Kim Min-jae leh midfielder tha dangte kan nei hian he team hian hun rei zawk chhung che tha turin theihna a nei tih a ti lang.” tiin a sawi a.
“Contract tha taka siam hi kan thiam zawng tak a ni a, chuvangin an chhuahna kawng tur a awm lo. Chelh an harsa dawn lo niin kan beisei. Chutihrualin engmah theih loh a awm lova, a chang chuan hnar theih miah loh chin a indawrna te hi a thleng ve thin. Mahse tunah chuan hunrei tak chhung kan tan an par vul dawn niin a lang.” tiin a sawi.
Kum 24 mi striker Osimhen hian tun season-ah goal 20 a khung tling tawh a, kum 22 mi winger Kvaratskhelia hian goal 12 leh assist 15 a nei tawh.