Nimin zing khan Rubber Board of India Executive Director Dr KN Raghavan leh a thawhpuite chuan Chief Minister Zoramthanga chu a pisa-ah an kawm a, Mizorama rubber chin hmalakna chungchang an sawipui.
An inkawmnaah hian Dr. Raghavan chuan India hmarchhak state-in rubber chinna kawngah hlawhtling tura theihna a neih that avanga ngawrh taka rubber chinah hmalak a nih mek thu a sawi a. Kum nga chhunga hectare nuai hniha zau rubber hmun hmarchhak bialah siam tumna a awm thu leh Mizoram pawh a huam tel thu a sawi a. Kuminah Mizoramah hectare 1,600-a zaua rubber phun tum a nih thu leh a tiak hi a thlawn vek a sem a nih dan te, awlsam zawk nan nursery siam tum a nih thu te chief minister a hrilh.
Chief minister pawhin rubber board hmalakna chu lawmawm tiin economy tihhmasawnna atan thil tha tak, Mizoram leh hmarchhak state dangte pawhin an thatpui phah ngei a beisei thu a sawi a. Transportation cost tihhniam nan a link road siam chungchanga mamawhna an thlen chu thil pawimawh tak a nih thu leh, a remchan dan ang zela theihtawp a chhuahpui tur thu a sawi.
Nimin vek khan Rubber Board hotuten Chief Secretary Dr Renu Sharma chu a pisa-ah an kawm bawk.