Aizawl district Superintendent of Police C Lalruaia’n Inrinni zinga gelatine hmanga Republic Venglai, Aizawla SBI ATM booth beitua puh, Emmanuel Lalbiakzauva an man thu nimin khan thuthar thehdarhtute a hrilh a. Aizawl district-ah rukru leh in rawk a hluar hle niin a sawi.
Aizawl SP chuan nimin khan a pisaa thuthar thehdarhtute kawmin Republic Venglaia SBI ATM booth beih chungchang chhui tura din, special investigation team (SIT)-in Nilaini chawhnu khan Ramhlun North-ah pawikhawihtua puh, Emmanuel Lalbiakzauva (24), Bawngthah khua, Ramhlun North-a a unaute nena mi in luaha khawsa mek an man thu a sawi.
ATM booth bomb thubuai an chhui dan sawiin, “He thubuai hi case serious takah ngaih a ni a, member 11 awmna SIT din nghal a ni a, Republic Venga-a ATM booth bomb a nih zan tho khan Bethlehem Venglai Apex Bank ATM-ah mi sual lutin CCTV camera a kap dum tih hriat zui a ni a, February 21-ah Saikhamakawna SBI ATM chu kar chhiat a ni tih leh CCTV chu kah dum a ni tih hriat a ni leh a, ATM pathum CCTV-a video enleta an chhui zuinaah a khawihtu chu mi pakhat nia hriat a ni,” a ti.
Aizawl SP-in a sawi danin pawikhawihtu chet velna an chhui zelnaah Ramhlun North thlanmual mawng lamah chhui luh a ni a, ATM khawihtu nia hriatin a hman nia hriat bike (FZ) chu ringhlelin an chang a, bike a la chhuak tur chu an lo man ta a ni.
An mi man, Emmanuel-a hian Republic Venglaia ATM booth chu gelatine hmangin a bomb ngei tih leh ATM hmundangte pawh a khawih ngei thu police hmaah a sawi niin Aizawl SP chuan a sawi a. Emmanuel chuan an man laiin a ipteah gelatine a lo ak nia sawiin, ATM-te a beih dawna a thawmhnaw hak te, a hmaikawr vuah thinte pawh an man tel nia sawiin, a bike kawl pawh chu Kulikawn atanga a ruk chhuah a ni tih a inpuanna atanga hriat chhuah a nih thu Aizawl SP chuan a sawi bawk.
Aizawl SP-in a sawi danin Emmanuel-a hi a rem rem thawk thin a ni a, SBI-ah loan a dil a, an pek duh loh avangin SBI ATM chu a bitum ta niin police hmaah a sawi.
Kumina Aizawl district police-in thubuai 471 an ziah luh tawh zinga thubuai 193 chu mi in rawk (burglary) a nih thu leh 155 chu rukruk (theft) thubuai a nih thu Aizawl SP chuan a sawi a, nikum 2022 chhunga Aizawl district police-in thubuai an ziah luh 2,684 zinga 73.02% zet chu rukruk leh in rawk thubuai a nih thu a sawi.
Aizawl SP chuan rukruk leh in rawk thubuaia an mi mante chu ruihhlo ti thin an nih tlangpui thu sawiin, hetiang thubuaia tam chhan hi ruihhlo a hluar vangah puh theih a nih thu a sawi bawk.