Aizawl: Planning & Programme Implementation Department changtu, Chief Minister Zoramthanga’n Mizoram State Healthcare Scheme (MSHCS) kalpui nana SEDP fund atanga sum an dah zawng zawng Rs vaibelchhe 150 a tling tawh tih house a hrilh.
Nimina Assembly session-a Thorang bialtu MLA Zodintluanga Ralte zawhna leh member dangte zawh belhna chhangin chief minister chuan Mizoram sorkar flagship programme SEDP hnuaiah healthcare chu ngaih pawimawh ber zinga mi a ni a, MSHCS kalpui nan SEDP fund atangin sum thahnem tak dah a ni tawh tih a sawi a. Kum 2019-20-ah Rs vaibelchhe 50, 2020-21-ah Rs vaibelchhe 10, 2021-22-ah Rs vaibelchhe 10 leh 2022-23-ah Rs. vaibelchhe 20 dah a nih thu sawiin, “Sorkar kumthar tur budget 2023-24-ah Rs. vaibelchhe 60 dah a ni leh a, heti hian SEDP fund atanga health care atana sum kan dah chu vaibelchhe 150 lai a ni chho ta,” a ti.
Zoramthanga chuan healthcare bill bate chu rulh zel a nih thu a sawi a, sorkar kum thara healthcare atana sum dah tur Rs vaibelchhe 60 atangin an rul leh dawn tih a sawi a. Sorkar kumtharah chuan Asian Development Bank atanga Rs. vaibelchhe 1,000 an puk tur chu hmuh hman an beisei a, bate chu a theih ang anga rulh zel an tum thu a sawi.
Chief minister chuan ADB loan puk tura state sorkar rulh tur chu Rs. vaibelchhe 280 a ni a, sorkar laipuiin a rulhsak tur vaibelchhe 720 a nih thu a sawi a. Loan hi hmuh a nih hunah a dahna turah an dah ang a, a pungte a lo awm dawn nen, healthcare-a inziah luhna sumte nen healthcare chu harsa lova kalpui zel an tum tih a sawi bawk.