Aizawl: Land Revenue & Settlement Minister Lalruatkima’n Vairengte leh Sairang inkar kawngpui zauh hna thawhna atana package 3 leh 4 chhunga ram pass neitu mi 434-ten zangnadawmna an dawng tawh tih house a hrilh.
Serchhip MLA Lalduhoma leh member dangte zawh belhnate chhangin revenue minister chuan kawngpui zauhna tura ram lak neitute hnena zangnadawmna pek chu revenue department kut a ni lo va, Ministry of Transport & Highway-in CALA atana a ruatin a pe chhuak thin tih a sawi.
Revenue minister chuan national highway 306 leh 06 four lane siamna tur atan hian package 1 atanga package 8 thleng ruahman a ni a, package 3 leh 4 chu Vairengte atanga Sairang inkar a nih thu sawiin, package 3 huam chhunga ram pass neitu mi 234 hnenah zangnadawmna pek a ni tawh a, chuta sum pek chhuah chu Rs 144,86,103.13 a nih thu leh package 4 chhunga ram pass nei mi 200-te hnenah Rs 121,32,18,196.49 pek chhuah a nih tawh thu a sawi.
Kawng zauhna tur package 3 leh 4 huam chhungah hian zangnadawmna dawng tura ngaih, house pass orginal an surender loh avang leh ram buai avanga zangnadawmna la pek loh 33 an awm thu a sawi a, “Zangandawmna la pek loh mi 33-te sum hmuh tur hi Rs. 8,75,68,499.58 a ni,” a ti.
Revenue minister chuan sorkar laipui ruahmana National Highway 306 leh 06 zauh hna thawhna turah hian package 1 atanga 8 thleng ruahman a ni a, package 1 leh 2 chu Assam ram chhung a ni a, Assam lam chan package 2 huam chhunga tel Vairengte mi house pass nei chhungkaw 15 an awm thu a sawi a. Chung mite sum dawn tur chu Kolasib CALA kaltlanga pek chhuah tur a nih thu a sawi.
“Assam lam chante chu zangnadawmna pek chhuah a la ni lo a, an pek chhuah hunah Kolasib CALA hnenah an transfer dawn a, ram neitu tan hlauhthawnna tur a awm lo” revenue minister chuan a ti bawk.