Palestinian helhovin Israel chhim lama rocket an kah hnah Israeli sipaite chuan Gaza Strip chu thlawhna hmangin an bei let ve.
Gaza atang hian rocket paruk kah chhuah niin panga chu an lo kap thla niin sipaiten an sawi a. Hemi hnu lawkah hian Israeli indo thlawhnate chuan Hamas helho hmun hnih an kap zui ve a ni.
Sipaite chetnaah hian tumah thi leh hliam an awm erawh hriat a ni lo.
Nilaini khan Israeli-te hian West Bank-a Nablus an luhchilhnaah Palestinian 11 an that a ni.
Gaza thunun mektu, Hamas leh hel pawl dang, Palestinian Islamic Jihad chuan chhan let ngei an tum tih an sawi nghal a ni.
Boruak tihdaih tuma bei mek, UN Middle East envoy Tor Wennesland chuan Ningani khan Gaza pan nghalin Hamas hruaitute a kawm nghal dawn tih Reuters news agency chuan a sawi.
A zin chhuah hma lawk hian, “Tharum thawhna a thleng leh civil mite thi an awm hi a pawi tak zet a ni,” tiin a sawi a. “Lehlam lehlam hi an boruak sa tak tihdaih tum turin ka ngen a ni,” a ti.
Ningania rocket kaptu-ah hian eng hel pawl mah an la inchhal lo va, Gaza chhehvela Israeli khawpui leh khaw eng emaw zat, Ashkelon leh Sderot velah pawh siren tihrik a ni.
Israel-a Iron Dome defence system hmanga kah thlak an nih nual avangin van sang lama thil puak pawh a awm nual niin Israeli sipaite chuan an sawi a. Rocket pakhat chu hmun awl laiah a tla nghe nghe.
Sipaite chuan a hnu darkar hnihah fighter jet hmangin Hamas ta, Gaza laili leh hmar lama an thil siamna hmun leh an sipai compound an kap zui ve nghal bawk tih an sawi.
Online-a video tar lanah chuan al-Bureij leh al-Shati refugee camp-ah kangmei a chhuak hluah hluah tih a lang.