Nilaini zing khan Israeli sipaite chuan khawpui hlui, West Bank-a Nablus chu luhchilhin Palestinian hel pawla mi langsar pathum man tum niin an insawi a. Hetih lai hian silai kengten an bei thut a, an inkap ta a ni.
Israeli sipaite hian an inpek duh loh avangin dara puta kah chi missile hmangin hel pathum tawmna in hi an kap a. Heng mi pathumte hi nikuma Israeli sipai thahnaa inhnamhnawihte niin an sawi bawk.
Civil mi eng emaw zat thi zingah an tel a, an zingah hian putar pathum an tel bawk.
Video thehdarh pakhatah chuan ralthuam engmah keng lo mipa eng emaw zat chu inkap thawm a awm lai hian an tlanchhia a, pakhat chu a tlu nghe nghe a. Israeli sipaite chuan he video hi an ennawn ve tur thu an sawi.
Tual chhung damdawi inte chuan hliam tuar eng emaw zat an enkawl thu sawiin an vai hian silaia kah an ni hlawm tih an sawi.
Doctor pakhatin BBC hnena a sawi dan chuan tun hnai kum eng emaw zat chhunga hetiang thil thleng a hmuhah chuan a la nasat ber thu a sawi.
Mipa naupang kum 15 mi, a kea hliam tuar chuan helho bula a din laiin Israeli-ten an kap fuh tih a sawi.
Palestinian thuneitu pakhat chuan ‘insuatna’ tiin a sawi a. Hamas chuan an dawhtheihnain ‘a tlin ta lo’ tih an sawi laiin Palestinian Islamic Jihad chuan chhan let chu ‘an tih tur’ a nih thu an sawi ve bawk.
Israel hian tun hnaiah West Bank-ah hian mi dap leh luhchhuah an ti nasa hle a, Israeli-te beitu Palestinian-te hmeh mih an tumna niin an sawi.
Kuminah ringawt hel leh civil mi Palestinian 60 chuang thah an ni tawh a. Israeli 10 Israeli leh Ukrainian pakhat an thi tawh bawk.
Boruak tihdaih tuma hma la reng, US chuan Nilaini khan ‘tharum thawhna thleng chu an ngaihvenin an thlithlai reng’ tih an sawi.