BBC Director General Tim Davie chuan India-a an hnuaia thawkte chu hlauh leh tute emaw tan bik nei miah lova an thil puan thin puang chhunzawm zel turin a ti.
Davie hian India-a an thawktute hi email a thawnah an kal dan thlak lo turin a ti a ni.
Tun hnai lawkah India-a chhiah thuneitute chuan India-ahhian Delhi leh Mumbai-a BBC pisate chu a dap chiam a ni.
Davie-a chuan an thawktute chu an huaisenna avanga lawm thu hrilhin an thil tihchhuah thina kimchang tak chu thil dang zawng aia pawimawh a nih thu a hrilh.
An hmunpui dap a ni hi tun hnai lawka Indian Prime Minister Narendra Modi-a demna lam documentary film tichhuaktu, BBC hian tha takin an thawhpui tih an sawi.
India chuan documentary tihchhuah hi ‘inawpna rilru’ thehdarhna a nih thu leh a ram chhunga tihchhuah tum chu a khap hmak bawk.
Davie chuan BBC hian an thawktute chu an hnaah leh an himnaah a pui zel dawn tih a sawi.
“Hlau lo leh duhsak bik nei lova thil kan puan theihna aia pawimawh a awm lo,” tiin a email-ah hian a ziak a ni.
“Kan hna chu khawvel puma min thlirtute hnena tumah rinchhan lo leh chanchin dik taka hrilh a ni a, thil tha ber ber tihchhuah leh pek chhuah a ni tel bawk a. He kan hna hi kan tawpsan dawn lo,” a ti.
“Chiang taka ka sawi duh chu: BBC hian eng thu ken mah kan nei lo va, kan tumin min hruai mai zawk thin a. Vantlang hnena kan tum hmasak ber chu chanchinthar dik leh rintlak, mipuiin an hriat thiam theih tura pek leh khawvel mite nena inpawh a ni,” a ti.
BBC pisa dap hi ni thum chhung zet niin daptute chuan ‘survey’ an nei mai chauh niin an sawi.
India-a Central Board of Direct Taxes hian an dapnaah hian ‘thil inmil lo leh inkalh’ a awm nual thu leh ‘chhiah pawh India-a ram dang miten an chawi tur ang pek loh chang a awm’ tih finfiahna an hmu tih an sawi.
Kar tir lamah khan UK-a eptu MP-te chuan ‘intihhlauh tumna’ a awm thu leh tha lo tak zeta an hriat thu an sawi.
Foreign Office minister chuan India-a income tax department-in an thil sawi hi sawi zui lo mah se ‘he thil hi uluk takin kan vil zui ang’ tih a sawi.