Khawvela ram hausa leh lian pasarih intelkhawm, Group of Seven (G7) an tihte chuan Myanmar-a mipui sipai sorkar duh lohna lantirtute laka tharum thawhtu sipaite chu thiam loh chantirtlakah an puang a, “An demawm takzet,” an ti.
“Keini, G7-a foreign minister intelkhawm- Canada, France, Germany, Italy, Japan, United Kingdom leh United States of America leh High Representative of the European Union chuan muanawm taka sorkar laka lungawi lohna lantirtu mipuite laka sipaite chet danah kan lungawi lo a, thiam loh chantirtlak an ni,” tiin G7 thuchhuah intawm an siam a ni.
Sputnik-in a tar lan dan chuan February 1 atanga Myanmar sipaiten an kuta an ram rorelna an dah hnuah lungawi lohna lantirtu mi pahnihin nunna an chân phah tawh.
Mi sing tam takin mipui rorelna paih thlak a nih vanga ram pumah lungawi lohna an lantir vangin sipaiten hleilenna an lantir.
G7 hian he thil thleng avanga nunna chânte chu an tawrhpuizia an tar lan bakah Myanmar sipaite chu mihring dikna chanvo leh khawvel intawm dan zah turin an hriattir.
Ralthuam keng lo mipuiten ralthuam hmanga beih an tawk chu an hriatthiam theih loh thu leh ralmuang taka lungawi lohna lantirtu laka kutthlaktute chu an phu tawk hremna pek ngei a tul tih an sawi bawk.
Foreign minister-te hian State Counsellor Aung San Suu Kyi leh President Win Myint te chhuah zalena Myanmar mipui duh ang ngeia mipui rorelna leh zalenna dinchhuahpui leh turin a hriattir nghal bawk a ni.