Aizawl : Disaster & Management & Rehabilitation Minister Lalchamliana’n National Disaster Management Authority (NDMA) fund hman dan inkaihhruaina thar a siam avangin chhiatna a thlenin chhawmdawlna in pek a tih khawtlai phah tih house a hrilh.
Budget session neih mekah nimina zawhna leh chhanna huna Lunglei East Bialtu MLA Dr K Pachhunga zawhna leh member dangte zawh belhna chhangin DM&R minister chuan, nikum khan National Disaster Management Authority (NDMA) in State Disaster Mitigation Fund leh State Disaster Response Fund te hman dan tur guideline a siam a, a khirh khan tak deuh avangin chhiatna a thlena chhawmdawlna tur in pek zung zung a harsa ta deuh tih a sawi.
DM&R minister chuan, “NDMA guideline ang chuan chhawmdawlna sum pek tur chu appraisal committee in an endik phawt anga chumi hnuah SDMA hnuaia State Executive Committee in a pawm pui leh phawt a ngai,” a ti a, hei hian an hna a ti muan phah hle tih a sawi a ni.
Chama chuan kum 2022 chhung khan chhiatna chi hrang hrang tawkte hnenah tanpuina Rs. 4,24,63,580 pek a nih thu a sawi bawk a ni.