Aizawl : Social audit resource persons te pu- ala training, ni 30 awh chu nimin khan Rural Development Minitser Lalruatkima hova khar a ni.
RD Minister chuan “Mizo ten social audit kan hmelhriat tanna chu kan rama ni za inhlawhna kan tih mai, Mahatma Gandhi National Rural Employment Guarantee Act, 2005, kum 2006 tawpa a lo chhuah tan khan a ni” a ti a. Social audit chu scheme leh programme te chu duan a nih chhan ang taka thawh a ni em tih te, engtiang takin nge mipuiin an hlawkpui tih mipui (beneficiaries) leh a thawktu (implementing agency) bakah sorkar hnathawk (official) ten a hmun ngeia an endika, thil felhlel awmte chawpchilha an siam fel/tih dik nghalna a nih thu a sawi.
Lalruatkima chuan social audit tha taka neih chu sorkar tha neihna kawng pawimawh tak a nih thu sawiin, “social audit chuan a dawngtute hnenah public sector programme te chu thuneihna a pe a, ruahmanna siam kawngah te, a tihhlawhtlin kawngah te, a hnathawh kawngah leh a en dik kawngah tha takin hna a thawk a ni” a ti.
RD department a thawktute thahnemngaih zarah Social audit pawimawhna leh thatna zirchiangin 27.7.2012 khan Directorate hranin an lo din daih tawh tih RD Miinister chuan sawiin, “North East a a nih dan tur ang taka social audit unit din hmasaber kan ni” a ti bawk.