BJP Mizoram state President Vanlalhmuaka chuan an sorkar hunah BJP state office ‘Mipui Run’ list an neih ve dawn loh thu a sawi.
Nimina an pisa-a Friday Political session neihah thu sawiin Vanlalhmuaka hian, “Sorkar tawhten an lo tih thin, hna lak dawna Bhavan list te, Hnam Run list an neih ang hi BJP kan sorkar chuan BJP state office ‘Mipui Run List’ hi kan nei ve dawn lo va, a thiam leh tlingte lak an ni dawn,” a ti.
Vanlalhmuaka hian Mizoramah BJP an sorkar chuan rorelna dik hi a takin an kalpui dawn tih a sawi a. Hna lak tur tam taka sum leh pai inthamna awm thin leh eirukna hi hnungkhirh a ni dawn a. Chumi an tih hunah chuan sorkar hnaah emaw, hna dang lakah pawh thalai tam tak sorkar hna pawh dil tha duh tawh lo leh beidawng tam takin an thiamna hmanga hna an hmuh theih zalen takin an bei thei tawh dawn niin a sawi.
An sorkar huna an ngaih pawimawh tur chu mamawhtu te hnena an mamawh thlensak a nih thu Vanlalhmuaka chuan a sawi bawk.