Thlasika ruahpui vanawn surin US-a mi tam tak nunphung a tibuai chhunzawm mek a. Vur tam tak tlain a thli a tleh a, khaw vawt a vin hle bawk.
State pangaah chhungkaw 9,00,000 chuang zet chuan electric an neih loh phah a, heng zinga chhungkaw 7,50,000 vel zet hi Michigan-a mite an ni.
Ningani khan thlawhna 3,000 dawn thlawk tur thulhtir leh tihkhawtlai an awm niin FlightAware chuan a tar lang bawk.
Vur thlipui tleh leh tla nasa lutuk avang hian sikul, zirna in leh state thenkhatah legislature pawh khar hial a ni.
Portland, Oregon-ah chuan zan khatah vur inches 11 dawn a tla niin National Weather Service chuan a sawi a, ni khata vur a tlak tam ber dawttu a ni phak hial a. Kawngpui a nal em em a, vur a chhah luk bawk avangin mipui chetvelna a buai phah nasa hle.
Minnesota Governor Tim Walz chuan kawngpui then hna thawkte pui turin National Guard a ko hial a ni.
New York Times chanchinbu chuan ruah sur nasa avang hian Michigan-ah mahnia inpea kangthelh hna thawktu a thih phah niin a tar lang a. A thih chhan tak hi a tar lang lo va, tual chhung chanchinbute erawh chuan powerline chatin a fuh niin an tar lang thung.
California chhim lam, kumtluan deuhthawa lum leh ni a kanna hmunah pawh mi maktaduai tel chu khaw vawt uchuak takin a tuam thei tih hrilh lawk an ni a, thlipui leh vur pawh thawk thei niin an sawi.
US hmun thenkhatah hian thli na lutuk an buaipui bawk a, California-a Bay Area-ah chuan thlipui hian redwood tree chhem thluin chenna in pakhata living room a delh niin tual chhung chanchinbute chuan an tar lang a. Fire thuneitute chuan naute kum khat mi a delh na hle niin an sawi.
Bay Area fire department chuan thing tlu a awm avanga kohna an dawng tam hle tih an sawi a, in a delh a, power line-te kawngah a vaw thla hneng hnuang niin an sawi bawk.
Canada-ah pawh Ontario chhim lamah zanah vur tlain ruahtui vawt tak a sur bawk a, Nilaini tlai, mi phusak vanglai takin vur nasa takin a tla bawk.
Hetih lai hian US hmun thenkhatah chuan hun dang aia a lum tur thu sawi lawk a ni a. Washington DC-ah chuan Ningani khan 26°C a ni dawn tih sawi lawk niin kum 1974 hnua February-a khua a lum leh ber tum a ni.
Nilaini khan McAllen, Texas-ah chuan 95°F zet a ni tawh a. Lexington, Kentucky leh Nashville, Tennessee-ah pawh kum 100 chuang record lo ding tawh khaw lum ber tum an tawng bawk.