Spain defender, kum 2010 World Cup an chawi tuma player pawimawh ni tawh Sergio Ramos chuan hreh tak chungin ram tana inkhelh a chawlhsan thu a puang.
Kum 36 mi Paris St-Germain defender hi Spain chanchin a ram tana inkhel hnem ber niin vawi 180 a inkhel tawh a. An manager thar Luis de la Fuente chuan ram tana inkhel tura a ko tawh dawn loh avangin thutlukna a siam tih a sawi.
Kum 2021 March hnu khan Spain tana inkhel tura ko a la ni leh lova. Coach hlui Luis Enrique khan World Cup khel tur squad zingah pawh a telh lo tawh.
“A hun a lo thleng ta a, kan ngainat leh phurna lian tak min siam thintu kan ram team chu ka mangtha a hun ve ta.”
“Ka zinkawng hi chhunzawm theih ka la inbeisei a, hetiang ni lo deuhin, duhawm zawka tawp theih hi ka duh. Kan huntawn tawh zawng zawngte nen pawha inmil zawkin a chawlh theih ang.” tiin Ramos chuan a chawlh dan chungchang a sawi.
Ramos hian De la Fuente nen telephone a an inbiak thu sawiin ram tan a ko tawh dawn lo tih a hrilh thu a sawi.
“Tukin zingah tuna coach nilai in min rawn bia a, ka chungah rinna a nghat dawn lo tih min rawn hrilh. Eng anga kheltha pawh ni ila, eng hlawhtlinna pawh nei ila, min ko tawh loh tur thu a sawi.” tiin Ramos chuan a sawifiah.
Kum 2005 a ram tana a khelh chhungin Euro vawi hnih a chawi hman bawk.