Aizawl: ZPM chuan nimin khan Directorate of Transport bulah ‘Ram hmasawnna chhuanlama sum siamna atana hmang thin sorkar rin zawh lohna punkhawm’ a huaihawt a, ZPM Working President K Sapdanga’n thu a sawi.
K Sapdanga hian ZPM Legislature Party leader leh sports minister an inhnial pawtawk palh a, an thu inchuh thelh nan speaker-in dawt sawi zawk chuan ngaihdam dil turin a chalrem a. ZPM leader-in a thu dawn kha a sual palh zawka hriain, house-ah leh ram mipuite hriatah ngaihdam a dil tih sawiin, “Kan leader hi dik lo nia a hriatah dawt phuahchawpa tan tlat a tum lo a, huaisen takin ngaihdam a dil a ni. Mualphona vawrtawp khum chunga khingpuite dik lo zawk pawh ngaidam thei leader, Pu Lalduhoma kan nei hi kan lawm a, kan chhuang tak zet a ni,” a ti.
Khaw tam takin phullem phah ngat khelmual an nei a, mipuite an lawm em em a, mipuite aia a let tam takin consultancy firm te, contractor-te a letin an lawm zawk niin a sawi a, “Heti taka sports hmasawnna atana hna thawk thaa kan inchhal lai hian mangang em em pawl an lo awm reng mai a, chung mite chu infiammite leh anmahni enkawltu sports association hrang hrangte an ni,” tia sawiin, chief minister leh sports minister ten cheng vaibelchhe chanchin hlir an sawi a, restricted tender hmangin consultancy firm leh construction firm te an vei sung sung niin a sawi.
He hunah hian ZPM PAC Member TBC Lalvenchhunga pawhin thu a sawi a. Phairothanga, General Secretary kaihhruaina hnuaiah resolution pali (4) an pass bawk.
ZPM resolution pass-te:
- Mizoram legislative assembly neih mekah dik leh huaisen taka kan leader pu Lalduhoma chet dan hi chhuanawm kan ti a, kan thlawp zel ang.
- Pu Zoramthanga kaihhruai mizoram sorkar a minister zingah hlemhletna leh dan pawisa lova che an awm hi kan hrethiam thei lo va. Dan rorelna nghak kher lova anmahni chhia leh tha hriatna hmanga inthiarfihlim nachang hre turin kan beisei a ni.
- Kan ramah hriselna leh zirna ngai pawimawh theilo khawpa mimal inhaivurna leh hleih neihna hi kan duh lo va. Ram hmasawnna tur mumal sum siamna a hmang sorkar hi bang turin kan phut a ni.
- Kan ramah rorelna dik leh tha, mipui huapzo sorkar din a nih theih nan kan bei zel ang.