Point thum hmuh nan goal khat a tawk a, Premier League hmahruaitu Arsenal in ‘champion zia’ tilangin 1-0 in Leicester City lakah hnehna an sualchhuak.
Inrinni zanah King Power Stadium-ah London club an lenglut a. Arsenal kheltha mahse Leicester City in an goal an venghim tha.
Second half tan veleh Brazilian winger in goal awmchhun a khung a. Leandro Trossard ball pek fing chu goal-ah a chantir.
Kheltha tak Trossard hian first half-ah goal pawm loh a nei a. A goal luhna turah defender Ben White chuan Danny Ward a lo ban buai nia a lan avangin pawm a ni lo.
Arsenal hian hnehna an chan avangin point hnihin Pep Guardiola pawl Manchester City lakah hma an hruai chhunzawm a, khelh khat erawhin an khel tlem zawk.
Leicester City in goal nawr lamah hlauhawm an nei tam lo. Mahse second half-ah Kelechi Iheanacho goal pawm loh an neih bakah Kiernan Dewsbury-Hall chuan khung teuh tak a nei bawk.
Arsenal manager Mikel Arteta chuan, “Kan inkhel a lungawithlak hle. Inkhel kan thunun a, an goal kan nawr ngun. Chance tha erawh kan insiam tam lova, hei hi kan siamthat ngai lai a ni. Mahse goal kan chhuah lo kha a pawimawh a. Chance tha vawi hnih khat chiah an nei.” tiin an inkhel a thlirlet a, inrintawkna an neih belh zel tih a sawi.
Man City an inlar leh ta
Team angin result an duh ang tunhnaiah an nei lo leh thin a. Kar hautak tak paltlang mahse kartawpah erawh Manchester City tak tak an inlar a, 4-1 in AFC Bournemouth an sawp.
City hian tunkarah Nottingham Forest lakah an hmahruaina an hum zo lova, goal hlauhawm nei tam zawk ni chungin an hriam loh rah an seng.
UEFA Champions League-ah pawh hetiang tho hi RB Leipzig laka an inkhel kaldan a ni a, an inhnehtawk ve leh.
Inrinni zan Vitality Stadium a inkhelah erawh harsatna an nei lo. Minute 15-naah Julian Alvarez chuan goal hmahruai a khung a. Goal khat an khung hnuah City an koham zual.
Striker Erling Haaland chuan a hna ngai chhunzawmin Premier League a a goal 27-na a khung a. City a zawm hnuah vawi 33 inkhel tawhin goal 33 a khung tawh.
Phil Foden chuan halftime-ah City goal thumna a khung a. Second half-ah Bournemouth in goal an chhuah belh a, Alvarez-a chance neih chu Chris Mepham chuan an lamah a ti lut palh.
Manchester City boss Pep Guardiola chuan, “Ni thum dana inkhel kan nih avangin kan zinchhuak nasa a, kan taksa inbuatsaih pawh a harsa thin. Mahse kan team in tum kan nei a, vawiinah kan hlen thei. Kan inkhelh dan a lungawithlak hle.” tiin a sawi ve bawk.