Lok Sabha MP Gaurav Gogoi chuan Assam-a BJP kaihhruai sorkar hnuaiah chuan mi hausa sate chauh an hausak belh niin a sawi.
Lok Sabha-a Congress deputy leader hian an hma lawka an state-a assembly inthlan neih turah nimin khan North Lakhimpur-ah hun a hmang.
Lakhimpur District Congress Committee leh Dhemaji District Congress Committee buatsaih vantlang inkhawmah hian an party hruaitu leh worker thahnem tak an tel.
“BJP kaihhruai sorkara thil inthlak awm chhun chu a nei sate neih belhin Guwahati-ah thil tha tak tak – hotel, shopping mall an neih belh hi a ni mai,” tiin Gogoi-a chuan a sawi.
“Prime minister-in thalai hna nei lote chu an intodelh theih nan pakoda zuar turin a ti a; mahse, Union Home Minister Amit Shah-a fapa hian pakoda a zuar em?” a ti.
Congress chuan inthlan lo awm turah sorkarna an siam ngei dawn tih a sawi bawk.
Assam Pradesh Congress Committee president Ripun Bora chuan BJP sorkar tawpna chu Lakhimpur atangin a intan dawn tih a sawi a. “BJP hian chief minister pahnih an nei a. Pakhat chu thlan chhuah ngei, Sarbananda Sonowal a ni a, pakhat chu mahnia inti-chief minister, Himanta Biswa Sarma a ni,” a ti.
He hunah hian hruaitu dang – Bhupen Bora, Rockybul Hussain leh Ranee Narah te pawhin thu an sawi.